സിരീ എയില്‍ യുവന്റസിനും സ്പാനിഷ് ലീഗില്‍ ബാഴ്സലോണക്കും ജയം. ലവാന്തയോട് കഷ്ടിച്ച് രക്ഷപെടുകയായിരുന്നു ബാഴ്സലോണയെങ്കില്‍ ജിയോനയോട് ആധികാരികമായി യുവന്റസ് ജയിക്കുകയായിരുന്നു. സൂപ്പർ താരം ലയണൽ മെസിയുടെ ഏക ഗോളിലായിരുന്നു ബാഴ്സയുടെ ജയം. യുവന്റസിന് വേണ്ടി റൊണാള്‍ഡോ രണ്ട് ഗോളും ദിബാല ഒരു ഗോളും നേടി.
ബാഴ്‍സ താരങ്ങളുടെ ഗോൾ ശ്രമങ്ങൾ പരാജയപ്പെടുത്തിയ ലവാന്ത ഗോൾ കീപ്പർ അയിതോർ ഫെർണാണ്ടസ് ആയിരുന്നു കളിയിലെ ഹീറോ. ബാഴ്സയുടെ നിരവധി ഗോൾ അവസരങ്ങളാണ് അയിതോർ തട്ടിത്തെറിപ്പിച്ചത്. ഒടുവിൽ 76 ാം മിനിറ്റിൽ മെസിയുടെ ഷോട്ട് അയിതോറിനെ പരാജയപ്പെടുത്തിയതോടെ കളി ബാഴ്സയുടെ കൈയ്യിലായി.
