കോട്ടയം മണ്ഡലത്തിലെ എല്‍.ഡി.എഫ് സ്ഥാനാര്‍ത്ഥി വി.എന്‍ വാസവന് നടന്‍ മമ്മൂട്ടിയെ കാണാന്‍ കൊച്ചിയിലെത്തി. ലോകം അറിയപ്പെടുന്ന കലാകാരന്റെ അനുഗ്രഹം തേടാനും സൗഹൃദം പുതുക്കാനുമാണ് താന്‍ എത്തിയതെന്ന് വാസവന് പറഞ്ഞു. തന്റെ ജന്മനാട്ടില്‍ നിന്നെത്തിയ സ്ഥാനാര്‍ത്ഥിക്ക് മമ്മൂട്ടി വിജയാശംസകള്‍ നേര്‍ന്നു.
പ്രചാരണ തിരക്കിനിയടിലും കോട്ടയത്ത് നിന്നും കൊച്ചിയിലെ വസതിയിലെത്തിയാണ് വി.എന്‍ വാസവന് മലയാളത്തിന്‍റെ മഹാനടന്‍ മമ്മൂട്ടിയെ കണ്ടത്. തന്റെ ജന്മനാട് ഉള്‍പ്പെടുന്ന കോട്ടയം മണ്ഡലത്തെ പ്രതിനിധീകരിച്ച് മത്സരിക്കുന്ന വാസവനുമായി മമ്മൂട്ടി വിശേഷങ്ങള്‍ പങ്കുവെച്ചു. പിന്നീട് പ്രചരണ പരിപാടികളും തെരഞ്ഞെടുപ്പ് വിശേഷങ്ങളും ചോദിച്ചറിഞ്ഞ് തികഞ്ഞ ഗൗരവക്കാരനായി.
ലോകം അറിയപ്പെടുന്ന കലാകാരന്റെ അനുഗ്രഹം തേടിയാണ് താന്‍ എത്തിയതെന്നും മമ്മൂട്ടിയുമായി സൗഹൃദം പുതുക്കാനായതില്‍ അതിയായ സന്തോഷമുണ്ടെന്നും വി.എന്‍ വാസവന് പറഞ്ഞു. കക്ഷി രാഷ്ട്രീയ ഭേദമന്യേ തനിക്ക് എല്ലാ രാഷ്ട്രീയനേതാക്കളുമായി നല്ല സൗഹൃദമാണുളളതെന്ന് പറഞ്ഞ മമ്മൂട്ടി വാസവന് വിജയാശംസകള്‍ നേര്‍ന്നു.
അരമണിക്കൂറോളം മമ്മൂട്ടിയോടൊപ്പം ചെലവഴിച്ച ശേഷമാണ് വി.എന്‍ വാസവന് തെരഞ്ഞെടുപ്പ് തിരക്കുകളിലേക്ക് മടങ്ങിയത്.
