അമേരിക്കൻ പ്രസിഡന്റ് ഡൊണാൾഡ് ട്രംപിന്റെ അഹമ്മദാബാദിലെ സന്ദർശനവുമായി ബന്ധപ്പെട്ട് ഗുജറാത്ത് ചെലവഴിക്കുക 80 കോടി മുതൽ 85 കോടി രൂപ വരെ ആയിരിക്കുമെന്ന് റിപ്പോര്‍ട്ട്. വാര്‍ത്താ ഏജന്‍സിയായ റോയിട്ടേഴ്സാണ് ഇക്കാര്യം റിപ്പോര്‍ട്ട് ചെയ്തത്. ഫെബ്രുവരി 24 ന് ആരംഭിക്കുന്ന തന്റെ ദ്വിദിന പര്യടനത്തിൽ ട്രംപ് നഗരത്തിൽ മൂന്ന് മണിക്കൂർ മാത്രമേ ചെലവഴിക്കൂ.
ഗുജറാത്തിന്റെ വാർഷിക ബജറ്റിന്റെ 1.5% ന് തുല്യമാണ് ഈ മൂന്നു മണിക്കൂര്‍ സന്ദര്‍ശനത്തിനായി സംസ്ഥാനം ചെലവഴിക്കുക. മൊത്തം ചെലവിൽ പകുതിയും സുരക്ഷയുമായി ബന്ധപ്പെട്ട ചെലവുകളാണെന്ന് പേര് വെളിപ്പെടുത്താത്ത ഉദ്യോഗസ്ഥർ റോയിട്ടേഴ്‌സിനോട് പറഞ്ഞു. 12,000 ത്തിലധികം പൊലീസ് ഉദ്യോഗസ്ഥരെ സന്ദർശനത്തിന്റെ ഭാഗമായി വിന്യസിക്കുമെന്നാണ് സൂചന. പ്രധാനമന്ത്രി നരേന്ദ്ര മോദിയും ട്രംപും അഹമ്മദാബാദിൽ റോഡ്ഷോ നടത്തും.
ലോകത്തിലെ തന്നെ ഏറ്റവും വലിയ ക്രിക്കറ്റ് സ്റ്റേഡിയമായ സർദാർ വല്ലഭായ് പട്ടേൽ സ്റ്റേഡിയം ട്രംപ് ഔദ്യോഗികമായി തുറന്നു കൊടുക്കാനിരിക്കുന്ന പരിപാടിയിൽ 1.25 ലക്ഷത്തോളം ആളുകൾ പങ്കെടുക്കുമെന്നാണ് പ്രതീക്ഷ. ഈ ചടങ്ങിനായി ദശലക്ഷക്കണക്കിന് രൂപ ചെലവഴിക്കുമെന്ന് ഗുജറാത്ത് ക്രിക്കറ്റ് അസോസിയേഷൻ സെക്രട്ടറി അശോക് ബ്രഹ്മഭട്ട് പറഞ്ഞു.
ലോകത്തിലെ ഏറ്റവും വലിയ ക്രിക്കറ്റ് സ്റ്റേഡിയം മെല്‍ബണിലായിരുന്നു. ഒരു ലക്ഷം സീറ്റുകളായിരുന്നു മെല്‍ബണ്‍ സ്റ്റേഡിയത്തിന്റെ ശേഷി. ഇതിനെ മറികടന്നാണ് 110,000 സീറ്റുകളുള്ള മോട്ടേര സ്റ്റേഡിയം ലോകത്തിലെ ഏറ്റവും വലിയ ക്രിക്കറ്റ് വേദിയായി മാറുന്നത്. ഒരു പ്രധാന ക്രിക്കറ്റ് മൈതാനത്തോടൊപ്പം രണ്ട് ചെറിയ ക്രിക്കറ്റ് മൈതാനങ്ങൾ, നാല് ലോക്കർ റൂമുകൾ, 75 എയർകണ്ടീഷൻഡ് കോർപ്പറേറ്റ് ബോക്സുകൾ, ഗുജറാത്ത് ക്രിക്കറ്റ് അസോസിയേഷൻ അംഗങ്ങൾക്കായി ഒരു ക്ലബ് ഹൌസ് എന്നിവയും ഇവിടെയുണ്ട്.
റോഡുകൾ വീതികൂട്ടുന്നതിനും പുതിയ ക്രിക്കറ്റ് സ്റ്റേഡിയത്തിന് ചുറ്റുമുള്ള അടിസ്ഥാന സൗകര്യങ്ങൾ മെച്ചപ്പെടുത്തുന്നതിനുമായി അധികൃതർ ഇതിനകം 300 ദശലക്ഷം രൂപ ചെലവഴിച്ചതായി അഹമ്മദാബാദ് മുനിസിപ്പൽ കമ്മീഷണർ വിജയ് നെഹ്‌റ പറഞ്ഞു. അഹമ്മദാബാദ് വിമാനത്താവളം മുതൽ മോട്ടേര സ്റ്റേഡിയം വരെ 20 കിലോമീറ്റർ നീളമുള്ള പതിനെട്ട് റോഡുകൾ വീതികൂട്ടുകയോ പുനർനിർമിക്കുകയോ ചെയ്തതായും നെഹ്‌റ പറഞ്ഞു. പക്ഷേ ട്രംപിന്റെ സന്ദർശനം സ്ഥിരീകരിക്കുന്നതിന് മുമ്പുതന്നെ ഇവയെല്ലാം ആസൂത്രണം ചെയ്തതാണെന്നും അദ്ദേഹം അവകാശപ്പെട്ടു.
