1953ല്‍ അംബേദ്കറുമായി ബി.ബി.സി നടത്തിയ അഭിമുഖത്തിന്റെ പ്രസക്ത ഭാഗങ്ങള്‍…
ഇന്ത്യയില്‍ ജനാധിപത്യം കാര്യക്ഷമമാകുമെന്ന് പ്രതീക്ഷിക്കുന്നുണ്ടോ?
ഇല്ല. പേരിന് മാത്രമുണ്ടാവും.
എന്താണുദ്ദേശിക്കുന്നത്?
നിയമവ്യവസ്ഥയില്‍ ജനാധിപത്യം നിലനില്‍ക്കും. തെരഞ്ഞെടുപ്പ് നടക്കും. പ്രധാനമന്ത്രിയെ തെരഞ്ഞെടുക്കും.
തെരഞ്ഞെടുപ്പ് നടക്കുക പ്രധാനമല്ലേ?
ആണ്. പക്ഷേ തെരഞ്ഞെടുപ്പ് വഴി നല്ല ആളുകള്‍ അധികാരത്തിലെത്തിയാല്‍ മാത്രം.
പക്ഷേ ഇതിലെല്ലാം മാറ്റം വരിക തെരഞ്ഞെടുപ്പ് വഴിയായിരിക്കില്ലേ?
ശരിയാണ്. പക്ഷേ ഞങ്ങള്‍ക്ക് വോട്ട് വഴി സര്‍ക്കാരുകളെ മാറ്റാമെന്ന് പോലും അറിയാത്ത എത്രയോ ആളുകളുണ്ട്. ജനങ്ങളാണ് പരമാധികാരികള്‍ എന്നറിയാത്ത എത്രയോ ജനങ്ങളുണ്ട്. കോണ്‍ഗ്രസിന്റെ ഉദാഹരണം നോക്കൂ. കാളക്ക് വോട്ട് ചെയ്യാനവര്‍ പറഞ്ഞു. കാള എന്ന ചിഹ്നം ആരെയാണ് പ്രതിനിധീകരിക്കുന്നതെന്ന് ജനങ്ങള്‍ക്കറിയാമായിരുന്നോ? ഏതെങ്കിലും വിദ്യാഭ്യാസമുള്ള ആളുകള്‍ കാളക്കാണോ വോട്ട് ചെയ്തത്. അല്ല. കാളക്ക് വോട്ട് ചെയ്യാന്‍ പറഞ്ഞു. കാളക്ക് വോട്ട് ചെയ്തു.
എന്നുവെച്ചാല്‍, ജനാധിപത്യം അതിന്റെ മൌലികാര്‍ത്ഥത്തില്‍ ഇന്ത്യയില്‍ ഫലം ചെയ്യില്ലെന്നാണോ?
അസാധ്യമാണ്. ഇവിടത്തെ സാമൂഹ്യ പ്രാതിനിധ്യ ഘടന പാര്‍ലമെന്ററി സമ്പ്രദായത്തിന് അനുയോജ്യമല്ല.
ഇത് സമത്വം, അസമത്വം എന്നിവയുമായി ബന്ധപ്പെട്ടതാണോ?
അതെ, ഇത് അസമത്വവുമായി ബന്ധപ്പെട്ടതു തന്നെയാണ്.
അതായത്, ജാതിവ്യവസ്ഥയില്‍ നിന്ന് മോചനം നേടാതെ മറ്റ് മാര്‍ഗമില്ലെന്നാണോ?
സാമൂഹ്യ ഘടനയുടെ പ്രശ്നമാണ്. അതുകൊണ്ട് അതില്ലാതാവുക തന്നെ വേണം. ഇത് പരിഹരിക്കാന്‍ സമയമാവശ്യമാണ്. പ്രാതിനിധ്യപ്രശ്നം ശാന്തമായി പരിഹരിക്കാന്‍ ശ്രമിച്ചാലും ജാതിവ്യവസ്ഥ മാറ്റാന്‍ വേണ്ടി വീണ്ടും പ്രയത്നമാവശ്യമായി വരും.
പക്ഷേ പ്രധാനമന്ത്രി ജാതിവ്യവസ്ഥയെ കുറിച്ച് ധാരാളം പ്രസ്താവനകള്‍ നടത്തുന്നുണ്ടല്ലോ?
ഈ പ്രസംഗങ്ങള്‍ അവസാനിക്കാന്‍ പോകുന്നില്ല. നോക്കൂ, തോമസ് കാര്‍ലൈൽ ഹെർബെർട്ട് സ്പെൻസറുടെ പുസ്തകങ്ങളെപ്പറ്റി പറഞ്ഞത് ഇംഗ്ലീഷുകാർ ക്രിസ്ത്യാനികളായി അഭിനയിക്കുകയാണെന്നാണ് (?). പ്രസംഗം മടുത്തു. ഇനി എന്തെങ്കിലും ചെയ്യുകയാണ് വേണ്ടത്. എന്തെങ്കിലും പദ്ധതികള്‍ പ്രാവര്‍ത്തികമാക്കട്ടെ.
ഈ പറയുന്നതെന്തെങ്കിലും പ്രായോഗികമാവുമെന്ന് സങ്കല്‍പിക്കുക. എന്താണ് താങ്കളുടെ അഭിപ്രായം?
സങ്കല്‍പലോകത്ത് എല്ലാം സാധ്യമാണ്. കമ്യൂണിസം പോലെ.
ജനാധിപത്യം ഈ രാജ്യത്ത് ഫലം ചെയ്യില്ലെന്ന് എന്തുകൊണ്ടാണ് കരുതുന്നത്? ജനങ്ങളുടെ ജീവിതനിലവാരം മെച്ചപ്പെടില്ലേ?
ആരാണീ തെരഞ്ഞെടുപ്പ് ബിസിനസിനെ സംരക്ഷിക്കുന്നത്? ജനങ്ങള്‍ക്ക് ഭക്ഷണം കഴിക്കാനാണാഗ്രഹം. അവര്‍ക്ക് അവരുടെ ഭൌതിക സുഖങ്ങളാണ് പ്രധാനം. അമേരിക്കയിലൊരു ജനാധിപത്യമുണ്ടല്ലോ. അവിടെ ഒരു കാലത്തും കമ്യൂണിസം വരുമെന്ന് തോന്നുന്നില്ല. ഞാനിപ്പോള്‍ അവിടെ നിന്നാണ് വരുന്നത്. അവരെനിക്ക് ഒരു ബിരുദം തരാന്‍ വേണ്ടി ക്ഷണിച്ചതാണ്. അവിടെ ഓരോ അമേരിക്കക്കാരന്റെയും ശബ്ദം കേള്‍ക്കപ്പെടുന്നുണ്ട്.
അതിവിടെ ഇന്ത്യയിലും ആരംഭിക്കില്ലേ?
എങ്ങനെ? ഇവിടെ ഭൂമിയില്ല. മഴ കുറവാണ്. കാട് കുറവാണ്. എന്തു ചെയ്യാന്‍ പറ്റും? ഇത് പരിഹരിക്കാതെ ഒന്നും നടക്കില്ല. ഭരണകൂടം ഈ പ്രശ്നങ്ങള്‍ പരിഹരിക്കാന്‍ ശ്രമിക്കുന്നുണ്ടെന്ന് തോന്നുന്നില്ല.
താങ്കള്‍ പറയുന്നത് ഈ സിസ്റ്റം തകരുമെന്നാണോ?
അതെ ഒരു കെട്ടിടത്തിന്റെ താഴ് ഭാഗം വീണാല്‍ കെട്ടിടം മുഴുവനായി വീഴും. അതായത്, താഴേക്കിടയിലുള്ളവര്‍ക്കാകും കൂടുതല്‍ നാശമുണ്ടാവുക. എന്റെ ജനത ഇപ്പോഴും അസ്പൃശ്യരായി തുടരുകയാണ്.
