ഡൽഹിയിൽ നടന്ന പ്രതിഷേധങ്ങളുമായി ബന്ധപ്പെട്ട് യുഎൻ മനുഷ്യാവകാശ ഹൈക്കമ്മീഷണറുടെ ഓഫീസ് (OHCHR) ഉന്നയിച്ച ആശങ്കകൾ ഇന്ത്യ തള്ളി. രാജ്യത്തിന്റെ ആഭ്യന്തര കാര്യങ്ങളിലെ “അനാവശ്യ ഇടപെടൽ” എന്നാണ് ഇന്ത്യയുടെ പ്രതികരണം.
സമാധാനപരമായി ഒത്തുകൂടാനും പ്രതിഷേധിക്കാനുമുള്ള അവകാശം ഇന്ത്യൻ ഭരണഘടന ഉറപ്പുനൽകുന്നതാണെന്ന് ഇന്ത്യ വ്യക്തമാക്കി. പൊതുസമാധാനവും സുരക്ഷയും ഉറപ്പാക്കുന്നതിനുള്ള ന്യായമായ നിയന്ത്രണങ്ങൾക്ക് വിധേയമായാണ് ഈ അവകാശം നടപ്പാക്കുന്നതെന്നും അധികൃതർ നിയമപ്രകാരമാണ് പ്രവർത്തിച്ചതെന്നും ഇന്ത്യയുടെ പ്രതികരണത്തിൽ പറയുന്നു.
യുഎൻ മനുഷ്യാവകാശ ഓഫീസ് വക്താവ് തമീം അൽ-ഖീത്താൻ, പ്രതിഷേധത്തിനുമുമ്പും ശേഷവും പ്രതിഷേധക്കാർ, നേതാക്കൾ, സിവിൽ സൊസൈറ്റി പ്രവർത്തകർ, അഭിഭാഷകർ, മാധ്യമപ്രവർത്തകർ എന്നിവർ ഉൾപ്പെടെയുള്ളവരെ കൂട്ടമായി കസ്റ്റഡിയിലെടുത്തെന്ന റിപ്പോർട്ടുകളിൽ ആശങ്ക രേഖപ്പെടുത്തിയിരുന്നു. സമാധാനപരമായ പ്രതിഷേധങ്ങളിലെ നിയന്ത്രണങ്ങൾ ആവശ്യകതയും ആനുപാതികതയും പാലിക്കണമെന്നും, അന്യായമായി കസ്റ്റഡിയിലെടുത്തവരെ വിട്ടയക്കണമെന്നുമായിരുന്നു ആവശ്യം.
മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രതിഷേധത്തിന്റെ പശ്ചാത്തലത്തിലാണ് ഡൽഹിയിൽ കർശന സുരക്ഷയും ഗതാഗത നിയന്ത്രണങ്ങളും ഏർപ്പെടുത്തിയത്. പ്രതിഷേധത്തിനിടെ നിരവധി പേരെ പൊലീസ് കസ്റ്റഡിയിലെടുത്തതായി വിവിധ റിപ്പോർട്ടുകൾ പറയുന്നു.
