ഈ സീസണ്‍ അവസാനിക്കുന്നതോടെ പ്രൊഫഷനല്‍ ഫുട്ബോളില്‍ നിന്ന് വിരമിക്കുമെന്ന് സ്പാനിഷ് താരം അറിറ്റ്സ് അഡൂറിസ്. ലാ ലിഗ ക്ലബ് അത്ലെറ്റിക്ക് ബില്‍ബാവോയുടെ താരമായ ഈ മുന്നേറ്റനിരക്കാരന്‍ രണ്ട് പതിറ്റാണ്ടോളം നീണ്ട കരിയറിനാണ് വിരാമമിടുന്നത്.
2000-ല്‍ അത്ലെറ്റിക്ക് ബില്‍ബാവോയുടെ ബി ടീമിനായി സ്പാനിഷ് രണ്ടാം ഡിവിഷനിലാണ് അഡൂറിസ് കരിയര്‍ തുടങ്ങിയത്. പിന്നീട് സീനിയര്‍ ടീമിനൊപ്പം ലാ ലിഗയിലെത്തി. പിന്നീട് വല്ലഡോയിഡിനൊപ്പം വീണ്ടും രണ്ടാം ഡിവഷനിലേക്കെത്തി. എന്നാല്‍ 2005 മുതല്‍ ബില്‍ബാവോയില്‍ തിരിച്ചെത്തിയതുമുതല്‍ പിന്നീട് ലാ ലിഗയില്‍ മാത്രമെ അഡൂറിസ് കളിച്ചിട്ടുള്ളു. ഇടയ്ക്ക് രണ്ട് സീസണ്‍ വീതം മയ്യോര്‍ക്കയ്ക്കും വലന്‍സിയക്കുമായി അഡൂറിസ് കളിച്ചു.
2012-ല്‍ വീണ്ടും ബില്‍ബാവോയിലെത്തി. ഇക്കുറി ലാ ലിഗയില്‍ തുടര്‍ച്ചയായി തന്റെ 15-ാം സീസണാണ് അഡൂറിസ് കളിക്കാനൊരുങ്ങുന്നത്. ലാ ലിഗയില്‍ മാത്രം 450-ലേറെ മത്സരം കളിച്ചിട്ടുണ്ട് അഡൂറിസ്. യൂറോപ്പാ ലീഗില്‍ രണ്ട് തവണ ടോപ് സ്കോറായിട്ടുമുണ്ട് അഡൂറിസ്.
