സ്വിറ്റ്സർലൻഡിലെ യുവതലമുറയിലെ മലയാളി ചലച്ചിത്രപ്രേമികൾ ചേർന്ന് ഒരുക്കിയ മലയാള സിനിമ ‘ത്രിലോക’യുടെ ട്രെയിലർ കഴിഞ്ഞദിവസം പുറത്തിറങ്ങി.

സ്വിസ് മലയാളികളുടെ രണ്ടാം തലമുറയുടെ സ്വപ്നങ്ങളും സൃഷ്ടിപരമായ ഊർജ്ജവും ചേർന്ന ഈ ചിത്രം, സ്വിറ്റ്സർലൻഡിന്റെ പശ്ചാത്തലത്തിൽ ഒരുങ്ങുന്ന ഒരു പുതുമയുള്ള ചലച്ചിത്ര ശ്രമമാണ്. മൂന്നു തലമുറകൾ ഒരുമിക്കുന്ന അപൂർവ്വമായൊരു സിനിമാനുഭവമായി ‘ത്രിലോക’യെ വിലയിരുത്താം. പുറത്തിറങ്ങിയ ട്രെയിലർ സിനിമയുടെ ഭാവവും മാനസിക ആഴവും ദൃശ്യഭാഷയും സൂചിപ്പിക്കുന്നു.

4EMOTIONS ENTERTAINMENT ബാനറിൽ ജോജി തന്തോന്നിച്ചിറ, നിധിൻ മാത്യൂസ്, റോബിൻ ഫിലിപ്പ്, സുരജ് മണ്ണഞ്ചേരിൽ എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. രാജേഷ് ജെയിംസ് സംവിധാനം നിർവഹിച്ച ചിത്രത്തിന്റെ തിരക്കഥ അദ്ദേഹത്തിനൊപ്പം വിജി ജെയിംസും ചേർന്നാണ് ഒരുക്കിയിരിക്കുന്നത്. ഛായാഗ്രഹണം സന്ദീപ് എബ്രഹാം കൈകാര്യം ചെയ്തപ്പോൾ, സംഗീത സംവിധാനം ആലൻ ഷോജി നിർവഹിക്കുന്നു. കേരളത്തിൽ നിന്ന് പ്രമുഖ സംവിധായകനും നടനുമായ ജിയോ ബേബിയുടെ പിന്തുണയും അവതരണവുമാണ് ‘ത്രിലോക’ ടീമിന് അഭിമാനിക്കാവുന്ന മറ്റൊരു ശക്തി. ചിത്രത്തിൽ അദ്ദേഹം ഒരു അതിഥി വേഷത്തിലും എത്തുന്നു.

ഡൽഹിയിൽ നടക്കുന്ന ഗ്ലോബൽ സിനിമ കൺവെൻഷൻ, പാരീസിൽ നടക്കുന്ന ഇന്റർനാഷണൽ ഇൻഡീ ഫിലിം ആൻഡ് സ്ക്രീൻപ്ലേ ഫെസ്റ്റിവൽ എന്നിവയിലേക്ക് ചിത്രം തെരഞ്ഞെടുക്കപ്പെട്ടിട്ടുണ്ട്. സ്വിറ്റ്സർലൻഡിലെ നാഷണൽ സ്വിസ് ഫിലിംസ് ഓർഗനൈസേഷനും ‘ത്രിലോക’യുമായി സഹകരിക്കുന്നുണ്ട്.

ജനുവരി 30, 2026-ന് സ്വിറ്റ്സർലൻഡിലെ സൂറിച്ചിൽ വേൾഡ് പ്രീമിയറോടെ തീയറ്റർ റിലീസിന് ഒരുങ്ങുന്ന ‘ത്രിലോക’, തുടർന്ന് യൂറോപ്യൻ രാജ്യങ്ങളിലുടനീളം പ്രദർശനത്തിനെത്തും. ട്രെയിലർ പുറത്തിറങ്ങിയതോടെ, രണ്ടാം തലമുറയുടെ ഈ പാഷൻ പ്രോജക്ട് വെള്ളിത്തിരയിൽ എങ്ങനെയൊരു അനുഭവമാകും എന്ന ആകാംക്ഷയിലാണ് സ്വിസ് മലയാളിസമൂഹം