കഴിഞ്ഞ ദിവസമായിരുന്നു ഉന്നാവില്‍ പ്രായപൂര്‍ത്തിയാകാത്ത മൂന്ന് ദലിത് പെണ്‍കുട്ടികളെ ബോധരഹിതരായി കൃഷിയിടത്തില്‍ കണ്ടെത്തിയത്. ആശുപത്രിയില്‍ എത്തിക്കുമ്പോഴേക്കും ഇതില്‍ രണ്ടുപേര്‍ മരണത്തിന് കീഴടങ്ങുകയായിരുന്നു. മൂന്നാമത്തെ പെണ്‍കുട്ടി ഗുരുതരാവസ്ഥയില്‍ കാണ്‍പൂരിലെ ആശുപത്രിയില്‍ ചികിത്സയിലാണ്. മരിച്ച പെണ്‍കുട്ടികളുടെ മൃതദേഹങ്ങള്‍ പോസ്റ്റുമോര്‍ട്ടത്തിന് ശേഷം വെള്ളിയാഴ്ചയോടെ സംസ്‌കരിച്ചു. പെണ്‍കുട്ടികളെ കണ്ടെത്തുമ്പോള്‍ മൂവരുടേയും വസ്ത്രങ്ങള്‍ കീറി കൈയിലും കഴുത്തിലും കെട്ടിയിരിക്കുന്നതായി കാണപ്പെട്ടുവെന്നാണ് വിവരങ്ങള്‍. കുട്ടികളുടെ മാതാപിതാക്കള്‍ തന്നെയാണ് കെട്ടുകള്‍ അഴിച്ച് മാറ്റിയത്. അതേസമയം അന്വേഷണം പുരോഗമിക്കുമ്പോഴും പെണ്‍കുട്ടികള്‍ മരിച്ചത് എങ്ങനെയെന്ന് ഇതുവരെ സൂചനയൊന്നും ലഭിച്ചിട്ടില്ല.