ഫിനിഷർ’ റോളിലെ പുത്തൻ താരോദയമായി പാക്കിസ്ഥാൻ താരം ആസിഫ് അലിയാണ് അവസാന ഓവറുകളിൽ പാകിസ്താനെ വിജയത്തിലേക്ക് നയിച്ചത്. ടൂർണമെന്റിലെ രണ്ടാം അർധസെഞ്ചുറി കുറിച്ച ക്യാപ്റ്റൻ ബാബർ അസമാണ് പാക്കിസ്ഥാന്റെ ടോപ് സ്കോററെങ്കിലും ആസിഫ് അലിയാണ് കളിയിലെ താരം.

അവസാന രണ്ട് ഓവറിൽ പാകിസ്താന് വിജയത്തിലേക്ക് വേണ്ടിയിരുന്നത് 24 റൺസായിരുന്നു. 19–ാം ഓവറിൽ നാലു പടുകൂറ്റൻ സിക്സറുകൾ സഹിതം വിജയത്തിലേക്ക് ആവശ്യമായ 24 റൺസും അടിച്ചെടുത്ത ആസിഫ്, അവസാന ഓവർ ബാക്കിയാക്കി ടീമിനെ വിജയത്തിലെത്തിച്ചു. ആസിഫ് അലി ഏഴു പന്തിൽ നാലു സിക്സറുകൾ സഹിതം 25 റൺസുമായി പുറത്താകാതെ നിന്നു.

സ്കോർ അഫ്ഗാനിസ്ഥാൻ 20 ഓവറിൽ 147-8, പാകിസ്താൻ 19 ഓവറിൽ 148-5. യുഎയിൽ കളിച്ച കഴിഞ്ഞ 18 മത്സരങ്ങളിൽ അഫ്ഗാനിസ്ഥാൻറെ ആദ്യ തോൽവിയാണിത്. യുഎഇയിൽ പാകിസ്താന്റെ തുടർച്ചയായ പതിനാലാം ജയവും.

ശ്രീലങ്കയുടെ സ്കോറായ 154/6 ചേസ് ചെയ്ത ഓസ്ട്രേലിയയ്ക്ക് 17 ഓവറിൽ 3 വിക്കറ്റ് നഷ്ടത്തിൽ വിജയം. ഡേവിഡ് വാർണറും ആരോൺ ഫിഞ്ചും ഒന്നാം വിക്കറ്റിൽ 6.5 ഓവറിൽ 70 റൺസാണ് ഓപ്പണിങ് കൂട്ടുകെട്ട് നേടിയത്.

23 പന്തിൽ 37 റൺസ് നേടിയ ഫിഞ്ചിനെ വനിൻഡു ഹസരംഗ ബൗൾഡാക്കിയപ്പോൾ തന്റെ അടുത്ത ഓവറിൽ മാക്സ് വെല്ലിനെയും ഹസരംഗ പുറത്താക്കി.എന്നാൽ സ്മിത്തും വാർണറും ചേർന്ന് മൂന്നാം വിക്കറ്റിൽ 50 റൺസാണ് കൂട്ടിചേർത്തത്. വാർണർ പുറത്തായ ശേഷം സ്മിത്ത് – സ്റ്റോയിനിസ് കൂട്ടുകെട്ട് അവശേഷിക്കുന്ന 25 റൺസ് നേടി ടീമിന്റെ വിജയം ഉറപ്പാക്കി. സ്മിത്ത് 28 റൺസും സ്റ്റോയിനിസ് 16 റൺസും നേടിയാണ് ഓസ്ട്രേലിയൻ വിജയം അനായാസമാക്കിയത്.

ഓസീസിനായി ആദം സാംപ നാലോവറിൽ 12 റൺസ് മാത്രം വഴങ്ങി രണ്ട് വിക്കറ്റെടുത്തപ്പോൾ മിച്ചൽ സ്റ്റാർക്ക് നാലോവറിൽ 27 റൺസിന് രണ്ട് വിക്കറ്റും പാറ്റ് കമിൻസ് നാലോവറിൽ 34 റൺസിന് രണ്ട് വിക്കറ്റും വീഴ്ത്തി.