ഇതിന്‍റെ അനുമതിക്കായി വീണ്ടും സ്പീക്കറെ കാണും. ഗവര്‍ണറുമായി ഏറ്റുമുട്ടി മുന്നോട്ടു പോകണ്ടെന്നായിരുന്നു സര്‍ക്കാരിന്‍റെ ആദ്യ തീരുമാനം. എന്നാല്‍ കേന്ദ്രത്തിനെതിരെ ഇന്നലെ സര്‍ക്കാര്‍ കടുത്ത നിലപാടുകള്‍ കൈക്കൊണ്ടിരുന്നു. നിയമസഭ ചേരുന്നതിന്‍റെ പ്രാധാന്യം തീരുമാനിക്കേണ്ടത് മന്ത്രിസഭയാണെന്ന് സ്പീക്കര്‍ പി. ശ്രീരാമ കൃഷ്ണന്‍ പറഞ്ഞു.

ഗവർണ്ണറുടെ നടപടി നിർഭാഗ്യകരമെന്നായിരുന്നു പ്രതിപക്ഷ നേതാവ് രമേശ് ചെന്നിത്തലയുടെ പ്രതികരണം. മന്ത്രിസഭയുടെ ശുപാർശ നിരാകരിച്ച ഗവർണറുടെ നടപടി ഭരണഘടനാ ലംഘനമാണെന്ന് കോൺഗ്രസ് നിയമസഭാകക്ഷി ഉപനേതാവ് കെ.സി.ജോസഫ് പ്രസ്താവിച്ചു. ഗവർണ്ണർ കേന്ദ്ര സർക്കാരിന്‍റെ ചട്ടുകമാകരുതെന്ന് സി.പി.ഐ സംസ്ഥാന സെക്രട്ടറി കാനം രാജേന്ദ്രനും ആവശ്യപ്പെട്ടു. കർഷകരെ ഗവർണ്ണർ ഒറ്റിക്കൊടുത്തെന്നാരോപിച്ച് യൂത്ത് കോൺഗ്രസ് രാജ്ഭവനിലേക്ക് മാർച്ച് നടത്തി. പോലീസ് ജലപീരങ്കി പ്രയോഗിച്ചു.അതേസമയം ഗവർണ്ണർക്ക് പിന്തുണയുമായി ബി.ജെ.പി രംഗത്തെത്തി. ഗവർണ്ണറുടെ നടപടി സ്വാഗതാർഹമെന്ന് ബി.ജെ.പി സംസ്ഥാന അധ്യക്ഷൻ കെ. സുരേന്ദ്രൻ പ്രസ്താവിച്ചു. പിന്നാലെ ഗവർണ്ണറെ അനുമോദിച്ച് കേന്ദ്ര മന്ത്രി വി.മുരളീധരനും ഒ.രാജഗോപാൽ എം.എൽ.എയും പത്രക്കുറിപ്പിറക്കി.