ടൂർണമെൻ്റിൽ ഏറ്റവും മികച്ച പ്രകടനം നടത്തിയ ബൗളർമാരിൽ ഒരാളായ വൈശാഖ് ചന്ദ്രനെ പുറത്തിരുത്തി ഇറങ്ങിയ കേരളം ദുർബലരായ പോണ്ടിച്ചേരിക്കെതിരെ വിയർക്കുന്നതാണ് ഇന്ന് കണ്ടത്. ആദ്യ മൂന്ന് വിക്കറ്റുകൾ വേഗം വീഴ്ത്താനായെങ്കിലും പിന്നീട് പോണ്ടിച്ചേരി തിരികെവരികയായിരുന്നു. അഞ്ചാം വിക്കറ്റിൽ പാരസ് ഡോഗ്രയും അരുൺ കാർത്തികും ഒത്തുചേർന്നതോടെ കേരളം ബാക്ക്ഫൂട്ടിലായി. 180 റൺസിൻ്റെ തകർപ്പൻ കൂട്ടുകെട്ടാണ് ഇരുവരും ചേർന്ന് പടുത്തുയർത്തിയത്. അരുൺ കാർത്തിക്, ആകാശ് കർഗവെ (48) എന്നിവർക്കൊപ്പം പോണ്ടിച്ചേരിയെ മികച്ച സ്കോറിലേക്ക് നയിച്ച ഡോഗ്ര വാലറ്റം എളുപ്പം കീഴടങ്ങിയതോടെ മുട്ടുമടക്കുകയായിരുന്നു. അവസാന വിക്കറ്റായാണ് ഡോഗ്ര പുറത്തായത്.