ഒക്ടോബര്‍ ഒന്ന് വരെയായിരുന്നു പാര്‍ലമെന്‍റിന്‍റെ വര്‍ഷകാല സമ്മേളനം നിശ്ചയിച്ചിരുന്നത്. എന്നാല്‍ കേന്ദ്രമന്ത്രിമ്മാര്‍ ഉള്‍പ്പടെ മുപ്പതിലധികം എം പിമ്മാര്‍ക്ക് കോവിഡ് സ്ഥിരീകരിച്ചതോടെ സമ്മേളനം വെട്ടിച്ചുരുക്കാമെന്ന് തീരുമാനത്തിലെത്തുകയായിരുന്നു. കാര്‍ഷിക പരിഷ്കരണ ബില്‍, തൊഴില്‍ നിയമ ഭേദഗതി ബില്‍ എന്നിവ പാസായതോടെ പ്രതിപക്ഷം ശക്തമായ പ്രതിഷേധം അഴിച്ച് വിട്ടതും സമ്മേളനം മുന്നോട്ട് കൊണ്ട് പോകേണ്ടതില്ലെന്ന നിലപാടിലേക്ക് സര്‍ക്കാരിനെ എത്തിച്ചു. 43 ബില്ലുകളാണ് പാര്‍ലമെന്‍റിന്‍റെ പരിഗണനക്ക് വിടാന്‍ സര്‍ക്കാര്‍ തീരുമാനിച്ചത്. കാര്‍ഷിക മേഖലയെ സംബന്ധിക്കുന്ന മൂന്ന് ബില്ലുകള്‍. വിദേശ സഹായ നിയന്ത്രണ ബില്‍, ആരോഗ്യപ്രവര്‍കത്തകര്‍ക്ക് നേരെയുള്ള അതിക്രമം തടയുന്ന ബില്‍ എന്നിവയടക്കം പ്രധാനപ്പെട്ട ബില്ലുകള്‍ പാസാക്കിയെടുക്കാന്‍ കേന്ദ്ര സര്‍ക്കാരിനായി.

ഇന്ന് മാത്രം പതിനാറോളം ബില്ലുകളാണ് ഇന്ന് രാജ്യസഭയുടെ പരിഗണനക്ക് വന്നത്. രാജ്യസഭാ ബില്ലുകള്‍ പാസാകും വരെ നീട്ടിക്കൊണ്ട് പോകും. അതിനാല്‍ ലോക്സഭാ വൈകീട്ട് ആറ് മണിക്കാണ് സമ്മേളിക്കുക. ഇന്ത്യാ- ചൈന സംഘര്‍ഷം, സാമ്പത്തിക പ്രതിസന്ധി, തൊഴിലില്ലായ്മ, കോവിഡ് പ്രതിരോധത്തിലെ പാളിച്ച എന്നിങ്ങനെയുള്ള വിഷയങ്ങള്‍ സര്‍ക്കാരിന് നേരെ ശക്തമായി ഉയര്‍ത്താനുള്ള അവസരം പ്രതിപക്ഷത്തിന് കിട്ടിയില്ല. എന്നാല്‍ രാജ്യസഭയിലെ കാര്‍ഷിക ബില്‍ വോട്ടെടുപ്പിനിടെയുണ്ടായ പ്രതിഷേധവും പ്രതിപക്ഷ എം.പിമാരെ പുറത്താക്കിയതും രാഷ്ട്രീയമായി ഉയര്‍ത്താന്‍ അവര്‍ക്ക് കഴിഞ്ഞു. സമ്മേളനം അവസാനിച്ചാലും കര്‍ഷക വിഷയം രാജ്യത്ത് സജീവ ചര്‍ച്ചയാകും.

പാര്‍ലമെന്‍റ് വര്‍ഷകാല സമ്മേളത്തില്‍ ചോദ്യോത്തര വേള ഒഴിവാക്കാനുള്ള കേന്ദ്ര നീക്കത്തിന് തിരിച്ചടി. പ്രതിപക്ഷം പ്രതിഷേധം ശക്തമാക്കിയതോടെ നിലപാട് മാറ്റി കേന്ദ്രം രംഗത്തെത്തി. നക്ഷത്ര ചിഹ്നമിടാത്ത ചോദ്യോത്തരത്തിന് അവസരമുണ്ടാകുമെന്ന് കേന്ദ്രം വ്യക്തമാക്കി.

കോവിഡ് പശ്ചാത്തലത്തിൽ നടക്കുന്ന സമ്മേളനമായതിനാൽ സമയം കുറവാണെന്ന ന്യായമാണ് ചോദ്യോത്തര വേള ഒഴിവാക്കാൻ കേന്ദ്രം ഉന്നയിച്ചിരുന്നത്. ചോദ്യോത്തരവേളക്ക് അവസരം നൽകാൻ നി൪വാഹമില്ലെന്നായിരുന്നു കേന്ദ്ര പാർലമെന്‍ററി കാര്യ മന്ത്രി പ്രൽഹാദ് ജോഷി, ബി.ജെ.പി ലോക്സഭ കക്ഷി ഉപ നേതാവ് രാജ്നാഥ് സിങ്, സഹമന്ത്രിമാരായ അ൪ജുൻ മേഖ്വാൾ, വി.മുരളീധരൻ എന്നിവ൪ മറ്റ് രാഷ്ട്രീയ പാ൪ട്ടികളുമായി ആശയവിനിമയം നടത്തിയത്. സാമൂഹി അകലം ഉറപ്പുവരുത്താനായി സമ്മേളനം പ്രത്യേക രീതിയിൽ ക്രമീകരിച്ചതിനാൽ ച൪ച്ച അസാധ്യമാണെന്നും കേന്ദ്രം ന്യായമായി ഉന്നയിച്ചിരുന്നു. ശൂന്യ വേള അര മണിക്കൂറായി പരിമിതപ്പെടുത്തുമെന്നും കേന്ദ്രം വ്യക്തമാക്കിയിരുന്നു. ഈ സാഹചര്യത്തിലാണ് ശക്തമായ പ്രതിഷേധവുമായി പ്രതിപക്ഷം രംഗത്തെത്തിയത്.

മഹാമാരിയുടെ മറവിൽ ജനാധിപത്യത്തെ കശാപ്പ് ചെയ്യാനുള്ള നീക്കമാണിതെന്ന് പ്രതിപക്ഷം വിമ൪ശിച്ചു. സർക്കാറിനെ ചോദ്യം ചെയ്യാനുള്ള അവകാശം എം.പിമാർക്ക് നഷ്ടപ്പെടുന്നത് ചരിത്രത്തിലാദ്യമാണെന്ന് തൃണമൂല്‍ കോണ്‍ഗ്രസ് എം.പിയും ച൪ച്ചയില്ലാതെ ഓര്‍ഡിനൻസുകൾ പാസാക്കാനുള്ള നീക്കമാണ് കേന്ദ്രത്തിന്‍റേതെന്ന് ഇടത് എംപിമാരും വിമ൪ശിച്ചു. ചോദ്യോത്തരം പുനസ്ഥാപിക്കണമെന്നാവശ്യപ്പെട്ട് കോൺഗ്രസ് കക്ഷി നേതാക്കൾ സഭാധ്യക്ഷന്മാ൪ക്ക് കത്തുമയച്ചു. ഇതിന് പിന്നാലെയാണ് കേന്ദ്രം നിലപാട് മയപ്പെടുത്തിയത്. നക്ഷത്രമിടാത്ത ചോദ്യങ്ങൾക്ക് അവസരമുണ്ടാകുമെന്നാണ് കേന്ദ്രത്തിന്‍റെ പുതിയ നിലപാട്.