കനത്ത മഴയെ തുടർന്ന് ഹരിയാനയിലെ ഗുരുഗ്രാമിൽ വെള്ളപ്പൊക്കം രൂപപ്പെട്ടു. ഉത്തരേന്ത്യയിൽ കനത്ത മഴയിലും വെള്ളപ്പൊക്കത്തിലും വ്യാപക കൃഷിനാശമാണ് ഉണ്ടായിട്ടുള്ളത്. അടുത്ത ആറ് ദിവസം കൂടി അതിശക്തമായ മഴ തുടരുമെന്നാണ് കാലാവസ്ഥ വകുപ്പ് മുന്നറിയിപ്പ് നൽകിയത്.

ഗുജറാത്ത്, രാജസ്ഥാൻ, മധ്യപ്രദേശ് സംസ്ഥാനങ്ങളിൽ 24 മണിക്കൂറിനിടെ കനത്ത മഴയും ഇടിമിന്നലും ഉണ്ടാകുമെന്നാണ് മുന്നറിയിപ്പ്. ഗോവ, കർണാടക, മഹാരാഷ്ട്ര, കൊങ്കൺ മേഖലകളിലും അതിശക്തമായ മഴ ഉണ്ടാകുമെന്നും കാലാവസ്ഥ വകുപ്പ് അറിയിച്ചു. ഉത്തരാഖണ്ഡിൽ ഉണ്ടായ മേഘവിസ്ഫോടനത്തിൽ മൂന്ന് പേർ മരിക്കുകയും നാല് പേരെ കാണാതാവുകയും ചെയ്തു.