മൂന്ന് അഴിമതി കേസുകളിലായി 20 കോടി രൂപയുടെ വെട്ടിപ്പ് നടന്നുവെന്നാണ് കുറ്റപത്രം. മുന്‍ ചീഫ് സെക്രട്ടറി ജോണ്‍ മത്തായി ഉള്‍പ്പെടെ മൂന്ന് പേരോടും വിചാരണ നേരിടാന്‍ ആണ് തൃശൂര്‍ വിജിലന്‍സ് കോടതി ഉത്തരവിട്ടത്.

2011ല്‍ ആണ് പ്രത്യേക ഉത്തരവിലൂടെ മൂന്ന് പേരെയും സര്‍ക്കാര്‍ പ്രതിസ്ഥാനത്ത് നിന്ന് ഒഴിവാക്കിയത്. കേസില്‍ ആ സമയത്ത് വിജിലന്‍സ് കോടതി വിചാരണ ആരംഭിച്ചിരുന്നു. ക്രിമിനല്‍ ചട്ടങ്ങള്‍ക്ക് വിരുദ്ധമായ സര്‍ക്കാര്‍ ഉത്തരവ് ഹൈക്കോടതി പിന്നീട് റദ്ദാക്കി.

മലബാര്‍ സിമന്‍റ്സിലെ നാല് അഴിമതി കേസുകളില്‍ പ്രതിയാണ് കെ. പത്മകുമാര്‍. ഈ കേസുകളെല്ലാം ഇപ്പോള്‍ നിലനില്‍ക്കുന്നതുമാണ്. നേരത്തെ വിദേശത്ത് നിന്നും കുടുതല്‍ പണം നല്‍കി ചേര്‍ത്തല പ്ലാന്‍റിലേക്കെന്ന പേരില്‍ ക്ലിങ്കര്‍ ഇറക്കുമതി ചെയ്ത്, പിന്നീടത് വാളയാറിലെ മലബാര്‍ സിമന്‍റ്സില്‍ കൊണ്ടുവന്ന് സിമന്‍റ് നിര്‍മ്മിച്ചതുമായി ബന്ധപ്പെട്ട കേസിലാണ് അദ്ദേഹം അറസ്റ്റിലാകുന്നത്. അറസ്റ്റ് നടക്കുമ്പോള്‍ കെ. പത്മകുമാര്‍ റിയാബിന്‍റെ സെക്രട്ടറിയായിരുന്നു. വിവാദമുയര്‍ന്നപ്പോഴാണ് അദ്ദേഹത്തെ ഒഴിവാക്കുന്നത്. നാലുമാസത്തോളം കേസില്‍ അദ്ദേഹം ജയില്‍വാസം അനുഭവിക്കുകയും ചെയ്തിട്ടുണ്ട്.

വീണ്ടും കെ പത്മകുമാര്‍ തന്നെ റിയാബിന്‍റെ സെക്രട്ടറിയായി വരുന്നത് മലബാര്‍ സിമന്‍റ്സുമായി ബന്ധപ്പെട്ട അഴിമതി കേസുകള്‍ പോലും അട്ടിമറിക്കപ്പെടാന്‍ സാധ്യതയുണ്ടെന്ന ആശങ്കയാണ് ഉയരുന്നത്.