സെക്രട്ടേറിയറ്റ് തീപിടിത്തത്തില്‍ ഫയലുകള്‍ നഷ്ടപ്പെട്ടിട്ടുണ്ടെന്ന് മുഖ്യമന്ത്രി പിണറായി വിജയന്‍. നഷ്ടപ്പെട്ടത് സുപ്രധാന ഫയലുകള്‍ അല്ല. രണ്ട് സംഘങ്ങള്‍ എന്താണ് സംഭവിച്ചതെന്ന് അന്വേഷിക്കുന്നുണ്ട്. ഒരാഴ്ചക്കകം റിപ്പോര്‍ട്ട് ലഭിക്കുമെന്നും മുഖ്യമന്ത്രി പറഞ്ഞു. എന്നാല്‍ സെക്രട്ടേറിയറ്റ് തീപിടിത്തത്തിന് പിന്നില്‍ അട്ടിമറിയെന്ന് രമേശ് ചെന്നിത്തല ആരോപിച്ചു. തീപിടിത്തത്തിന്റെ മറവില്‍ പല ഫയലുകളും കടത്തിയെന്നും ചെന്നിത്തല പറഞ്ഞു.

അതേസമയം സെക്രട്ടറിയേറ്റില്‍ തീപിടിത്തമുണ്ടായ ഓഫീസിലെ ഫയലുകള്‍ നീക്കരുതെന്ന് വിദഗ്ധ സമിതി. ഇവിടെ മുഴുവന്‍ സമയ പൊലീസ് സുരക്ഷ വേണം, തെളിവെടുപ്പ് പൂർണ്ണമായും വീഡിയോയിൽ ചിത്രീകരിക്കണമെന്നും ഡോക്ടര്‍ കൗശികൻ്റെ നേതൃത്വത്തിലുള്ള സംഘം സമർപ്പിച്ച റിപ്പോർട്ടിൽ പറയുന്നു. എന്നാല്‍ തീപിടിച്ച സംഭവത്തില്‍ ചീഫ് സെക്രട്ടറിയെ വിളിച്ചുവരുത്തി വിശദീകരണം തേടണമെന്നാവശ്യപ്പെട്ട് രമേശ് ചെന്നിത്തല നൽകിയ കത്ത് ഗവര്‍ണര്‍ തുടർ നടപടിയ്ക്കായി മുഖ്യമന്ത്രിയ്ക്ക് കൈമാറി.

സെക്രട്ടറിയേറ്റിലുണ്ടായ തീപിടുത്തത്തിന് കാരണം ഷോർട്ട് സർക്യൂട്ടാണെന്ന് അന്വേഷണ സംഘത്തിന്‍റെ പ്രാഥമിക നിഗമനം. കേടായ ഫാനിന്‍റെ സ്വിച്ചിൽ നിന്നാണ് തീപിടിത്തമുണ്ടായതെന്നാണ് വിലയിരുത്തൽ. ഫോറൻസിക് പരിശോധന ഫലം ലഭിച്ചാൽ മാത്രമേ യഥാർത്ഥ കാരണം വ്യക്തമാകൂ.

ഫയൽ കത്തലിൽ പ്രതിപക്ഷം ദുരൂഹത ആരോപിക്കുമ്പോഴും അട്ടിമറി സാധ്യത തള്ളുകയാണ് അന്വേഷണ സംഘം. കേടായ ഫാനിന്‍റെ സ്വിച്ചിൽ നിന്നാണ് തീപിടുത്തം ഉണ്ടായതെന്നാണ് അന്വേഷണ സംഘം പ്രാഥമിക വിലയിരുത്തൽ. സ്വിച്ചിൽ നിന്ന് തീ പകർന്ന് കേബിൾ വഴി ഫാനിലെത്തി അത് പേപ്പറിന് മുകളിലേക്ക് വീണ് കത്തിയതാണെന്നാണ് അന്വേഷണസംഘം വിലയിരുത്തുന്നത്. അന്തിമ റിപ്പോർട്ട് തയ്യാറാകണമെങ്കിൽ ഫോറൻസിക് പരിശോധന ഫലം കിട്ടണം. ദുരന്തനിവാരണ അതോറിറ്റിയുടെയും ക്രൈം ബ്രാഞ്ചിന്‍റെയും അന്വേഷണം പുരോഗമിക്കുകയാണ്. വേഗത്തിൽ അന്വേഷണം പൂർത്തിയാക്കി റിപ്പോർട്ട് സമർപ്പിക്കാൻ സർക്കാർ നിർദ്ദേശം നൽകിയിട്ടുണ്ട്.

മന്ത്രിമാരുടെ പ്രോട്ടോകോള്‍ സംബന്ധിച്ച ഫയലുകള്‍ കത്തിനശിച്ചുവെന്ന് ഹൌസ് കീപ്പിങ് അഡീഷണല്‍ സെക്രട്ടറി ഹണി മീഡിയവണിനോട് പറഞ്ഞു. മന്ത്രിമാരുടെ വസതി സംബന്ധിച്ച ഫയലും കത്തിനശിച്ചു. നയതന്ത്ര ഫയലുകള്‍ ഇ-ഫയലാക്കിയിട്ടില്ലെന്നും ഹണി പറഞ്ഞു.

അതേസമയം സംഭവത്തില്‍ അന്വേഷണം ആരംഭിച്ചിട്ടുണ്ട്. പൊലീസ് എഡിജിപി മനോജ് എബ്രഹാമിന്‍റെ മേല്‍നോട്ടത്തിലാണ് അന്വേഷണം. സംഭവത്തില്‍ ദുരന്തനിവാരണവിഭാഗവും അന്വേഷണം നടത്തുന്നുണ്ട്. ഹൌസ് കീപ്പിംഗ് വിഭാഗം സംഭവത്തെ കുറിച്ച് ചീഫ് സെക്രട്ടറിക്ക് റിപ്പോര്‍ട്ട് സമര്‍പ്പിക്കും.

സെക്രട്ടേറിയറ്റില്‍ പ്രോട്ടോകോള്‍ വിഭാഗത്തിലാണ് ഇന്നലെ തീപിടിത്തമുണ്ടായത്. സ്വര്‍ണക്കടത്ത് വിവാദവുമായി ബന്ധപ്പെട്ട് ഏറെ ചര്‍ച്ച ചെയ്യപ്പെട്ട വിഭാഗമാണ് സെക്രട്ടേറിയറ്റിലെ പ്രോട്ടോകോള്‍ ഓഫീസ്. കംപ്യൂട്ടറില്‍ നിന്നുള്ള ഷോര്‍ട്ട് സര്‍ക്യൂട്ടാണ് തീപിടിത്തത്തിന് കാരണമെന്നായിരുന്നു പ്രാഥമിക നിഗമനം.