രാവിലെ ഗാന്ധി പ്രതിമയിലും പാളയം രക്തസാക്ഷി മണ്ഡപത്തിലും പുഷ്പാര്‍ച്ചന നടത്തിയ ശേഷം പത്തരയോടെ കെ സുധാകരന്‍ കെപിസിസി ആസ്ഥാനത്ത് എത്തും. തുടര്‍ന്ന് സേവാദള്‍ വോളന്‍റിയര്‍മാരുടെ ഗാര്‍ഡ് ഓഫ് ഓണര്‍ സ്വീകരിക്കും. പതാക ഉയര്‍ത്തിയ ശേഷം 11 മണിയോടെ ചുമതലയേല്‍ക്കും.

xവര്‍ക്കിങ് പ്രസിഡന്‍റുമാരായ ടി സിദ്ദീഖ്,പിടി തോമസ്,കൊടുക്കുന്നില്‍ സുരേഷ് എന്നിവരും സ്ഥാനം ഏല്‍ക്കും. ഉച്ചയ്ക്ക് ശേഷം ചേരുന്ന നേതൃയോഗത്തില്‍ കെപിസിസി, ഡിസിസി പുനസംഘടനയുടെ കാര്യത്തില്‍ പ്രാഥമിക ചര്‍ച്ചകള്‍ നടക്കും. എന്നാല്‍‌ പുനസംഘടനയ്ക്കായി അഞ്ച് അംഗ സമിതിയെ നിയോഗിക്കുമെന്ന കെ സുധാകരന്‍റെ പ്രസ്താവനയില്‍ എ, ഐ ഗ്രൂപ്പുകള്‍ അതൃപ്തരാണ്. ഏകപക്ഷീയമായി തീരുമാനങ്ങള് പ്രഖ്യാപിക്കുന്നതായി കാണിച്ച് ഹൈക്കമാന്‍റിന് പരാതി നല്‍കാനാണ് നീക്കം. എന്നാല്‍ ആക്ഷേപങ്ങളെ കെ സുധാകരന്‍ തള്ളി

ഇടഞ്ഞ് നില്‍ക്കുന്ന മുതിര്‍ന്ന നേതാക്കളെ അനുനയിപ്പിക്കാനും ഹൈക്കമാന്റ് നീക്കം ആരംഭിച്ചു. സുധാകരന്‍ അധ്യക്ഷ സ്ഥാനം ഏറ്റെടുക്കുന്ന ചടങ്ങില്‍ പങ്കെടുക്കാനായി എത്തിയ എഐസിസി ജനറല്‍ സെക്രട്ടറി താരീഖ് അന്‍വര് നേതാക്കളുമായി ആശയവിനിമയം നടത്തും.

പ്രവർത്തകർക്കിടയിൽ ആത്മ വിശ്വാസമുണ്ടാകാൻ സുധാകരന്റെ വരവ് സഹായിക്കുമെന്ന് എ കെ ആന്റണി. പ്രവർത്തകരെയും നേതാക്കളെയും ഒറ്റക്കെട്ടായി മുന്നോട്ട് കൊണ്ടു പോകണമെന്നും ആന്റണി പറഞ്ഞു. കെ സുധാകരനെ കെ.പി.സി.സി പ്രസിഡന്റാക്കിയത്.പ്രവർത്തകർക്ക് ആവേശം പകരുന്ന തീരുമാനമെന്ന് പ്രതിപക്ഷ നേതാവ് വി.ഡി സതീശൻ പറഞ്ഞു. തലമുറ മാറ്റം എന്ന് പറഞ്ഞാൽ ചിലരെ പൂർണമായി ഒഴിവാക്കളല്ലെന്നും അദ്ദേഹം പറഞ്ഞു. കെ.പി.സി.സി അധ്യക്ഷനായി കെ സുധാകരനെ തരെഞ്ഞെടുത്ത ഹൈക്കമാൻഡ് തീരുമാനം മുസ്‌ലിം ലീഗ് സ്വാഗതം ചെയ്തു. കോണ്‍ഗ്രസിന് പുതുജീവൻ നൽകുന്ന തീരുമാനമാണെന്ന് പി കെ കുഞ്ഞാലിക്കുട്ടി പറഞ്ഞു. നേതാക്കളും അണികളുമായി നല്ല ബന്ധം പുലർത്തുന്ന നേതാവാണ് സുധാകരനെന്നും കുഞ്ഞാലിക്കുട്ടി പ്രതികരിച്ചു. അതേസമയം, ഔദ്യോഗിക പ്രഖ്യാപനത്തിന് മുൻപ് സുധാകരൻ മാധ്യമങ്ങളെ കണ്ടതിൽ ഹൈക്കമാൻഡ് അതൃപ്തി അറിയിച്ചു. താരീഖ് അൻവർ സുധാകരനെ വിളിച്ചാണ് അതൃപ്തി അറിയിച്ചത്. എന്നാൽ മാധ്യമങ്ങളെ താനായിട്ട് വിളിച്ച് വരുത്തിയതല്ലെന്ന് സുധാകരൻ പറഞ്ഞു.