ഹിന്ദുത്വ വെബ്സെെറ്റായ ‘ഓപ് ഇന്ത്യ’യെ പ്രതിനിധീകരിക്കുന്ന അഭിഭാഷകനാണ് ഷര്‍ട്ടില്ലാതെ കോടതിയില്‍ ഹാജരായത്. അഭിഭാഷകന്റെ നടപടി കോടതിയോടുള്ള അവഹേളനമാണെന്ന് ജസ്റ്റിസ് ചന്ദ്രചൂഡ് പറഞ്ഞു. പൊറുക്കാനാകാത്ത തെറ്റാണിതെന്ന് ബെഞ്ചിലുണ്ടായിരുന്ന ജസ്റ്റിസ് ഇന്ദു മല്‍ഹോത്രയും പറഞ്ഞു.

സുപ്രീംകോടതിയുടെ ഓണ്‍ലൈന്‍ ഹിയറിങ്ങിനിടെ ഇതാദ്യമായല്ല കോടതി ചട്ടങ്ങള്‍ ലംഘിക്കപ്പെടുന്നത്. നേരത്തെ സുപ്രീംകോടതിയുടെ തന്നെ ഓണ്‍ലൈന്‍ ഹിയറിങ്ങിനിടെ ഒരു മുതിര്‍ന്ന അഭിഭാഷകന്‍ പുകവലിച്ചത് വിവാദമായിരുന്നു.

നേരത്തെ, രാജസ്ഥാന്‍ ഹൈക്കോടതിയുടെ ഓണ്‍ലൈന്‍ വാദത്തിനിടെ അഭിഭാഷകരിലൊരാള്‍ അടിവസ്ത്രത്തില്‍ എത്തിയിരുന്നു. കോവിഡ് കാലത്തെ പ്രത്യേക കോടതി കാര്യങ്ങള്‍ക്ക് പങ്കെടുക്കുന്നതിലും അഭിഭാഷകര്‍ ശരിയായ യൂണിഫോം ധരിക്കണമെന്ന് ഹൈക്കോടതി ജഡ്ജ് അന്ന് ചൂണ്ടിക്കാട്ടുകയായിരുന്നു. ഓണ്‍ലൈന്‍ ഹിയറങ്ങിനിടെ പുകവലിച്ച അഭിഭാഷകന് പതിനായിരം രൂപ പിഴയിടുകയായിരുന്നു ഗുജറാത്ത് ഹൈക്കോടതി ചെയ്തത്.