കേരള ബ്ലാസ്റ്റേഴ്‌സ് ആരാധകര്‍ കാത്തിരുന്ന നിമിഷമായിരുന്നു. ഹോം ഗ്രൗണ്ടിന്‍റെ ആവേശം കൊവിഡ് കവര്‍ന്നപ്പോള്‍ ഇതുപോലൊന്ന് കൂടാനായി കാത്തിരിക്കുകയായിരുന്നു മഞ്ഞപ്പട ആരാധകര്‍. നിരാശ മറച്ചുവെക്കാതിരുന്ന ക്ലബ് തന്നെ സ്റ്റേഡ‍ിയത്തിന് പുറത്ത് വമ്പന്‍ സ്ക്രീനില്‍ ആരാധകര്‍ക്ക് ഒരുമിച്ചിരുന്ന് കളി കാണാനുള്ള അവസരമൊരുക്കി. സഹല്‍ അബ്‌ദുല്‍ സമദിന്‍റെ ക്ലാസിക് ഗോളില്‍ ജംഷഡ്‌പൂരിനെ ബ്ലാസ്റ്റേഴ്‌സ് മലര്‍ത്തിയടിച്ചപ്പോള്‍ ആഘോഷിക്കാന്‍ മഞ്ഞപ്പട ആരാധകര്‍ക്ക് ഒരു രാത്രി കലൂരില്‍ തികയാതെ വന്നു. ബ്ലാസ്റ്റേഴ്‌സിന്‍റെ പഴയ സീസണുകള്‍ ഓര്‍മ്മിപ്പിച്ച് എറണാകുളത്തിന് പുറത്ത് മറ്റ് ജില്ലകളില്‍ നിന്ന് വരെ ആരാധകര്‍ കലൂരിലേക്ക് ഒഴുകിയെത്തുകയായിരുന്നു. ക്ലബിനും ആരാധകര്‍ക്കും ഒരുപോലെ സന്തോഷം നല്‍കിയ നിമിഷങ്ങള്‍.