കഴിഞ്ഞ പതിനെട്ട് മാസമായി കടുത്ത പ്രതിസന്ധിയാണ് നേരിടുന്നതെന്നാണ് ബസുടമകള്‍ പറയുന്നത്. പല ബസുകളും കട്ടപ്പുറത്താണ്. സര്‍ക്കാര്‍ ഇളവുകള്‍ നല്‍കിയിട്ടും 60 ശതമാനം ബസുകള്‍ മാത്രമാണ് നിരത്തിലിറങ്ങിയിരിക്കുന്നത്. ബാക്കിയുള്ളവ നഷ്ടത്തിലാണ്. പലര്‍ക്കും ഭീമമായ നഷ്ടമുണ്ടെന്നും ബസ് ചാര്‍ജ് വര്‍ധനയാണ് പരിഹാരമെന്നും ഇവര്‍ ചൂണ്ടിക്കാട്ടുന്നു. വിദ്യാര്‍ത്ഥികളുടെ ബസ് ചാര്‍ജ് ഒരു രൂപയില്‍ നിന്ന് അഞ്ച് രൂപയാക്കണമെന്നാണ് ആവശ്യം. ഇക്കാര്യങ്ങള്‍ ചൂണ്ടിക്കാട്ടി ബസുടമകള്‍ വിദ്യാഭ്യാസമന്ത്രി വി. ശിവന്‍കുട്ടിയേയും കണ്ടു.

നിലവില്‍ ബസുടമകള്‍ സമരം പ്രഖ്യാപിച്ചിട്ടില്ല. എന്നാല്‍ ഈ മാസം 30 ന് മുന്‍പ് തീരുമാനമെടുത്തില്ലെങ്കില്‍ കടുത്ത പ്രതിഷേധത്തിലേക്ക് കടക്കുമെന്നാണ് ബസുടമകള്‍ മുന്നറിയിപ്പ് നല്‍കുന്നത്.

കോവിഡ് കാരണം യാത്രക്കാർ കുറഞ്ഞപ്പോഴാണ് നഷ്ടം നികത്താൻ കെ.എസ്.ആർ.ടി.സി ടിക്കറ്റ് ചാർജ് കൂട്ടിയത്. ജൂൺ മാസം നിലവിലുണ്ടായിരുന്ന നിരക്കിൽ നിന്ന് 25 % ചാർജ് വർധിപ്പിച്ചു. ഇപ്പോൾ ഇളവുകൾ പ്രഖ്യാപിച്ചതോടെ യാത്രക്കാരുടെ എണ്ണം കൂടി. ഇതേ തുടർന്നാണ് ചാർജ് കുറക്കാൻ സർക്കാർ തീരുമാനിച്ചത്. ജനുവരിയിൽ ജസ്റ്റിസ് രാമചന്ദ്രൻ കമ്മീഷനെ സമീപിച്ച് റിപ്പോർട്ട് ആവശ്യപ്പെടും. എന്നാൽ കോവിഡിന് മുമ്പുണ്ടായിരുന്ന നിലയിലേക്ക് നിരക്ക് കുറക്കില്ല. ജൂണിലെ നിരക്കിൽ നിന്ന് 10 ശതമാനം വരെ വർധനവ് ആകാമെന്നാണ് ഗതാഗത വകുപ്പിന്‍റെ ശിപാർശ. മിനിമം ചാർജ് ഇപ്പോൾ 8 രൂപയാണ്. മിനിമം ചാർജിൽ സഞ്ചരിക്കാവുന്ന ദൂരം 5 കിലോമീറ്ററിൽ നിന്ന് രണ്ടരയായി കുറച്ചിരുന്നു. ഇതിലും മാറ്റമുണ്ടാകും.