ബുധനാഴ്ച നടത്താനിരിക്കുന്ന ബി.എസ്.സി. നഴ്സിംഗ് പരീക്ഷ സാഹചര്യം മനസിലാക്കി മാറ്റി വെക്കണമെന്നാണ് വിദ്യാർത്ഥികളുടെ ആവശ്യം. എന്നാൽ പരീക്ഷ മാറ്റുന്നത് പരിഗണനയിലില്ലെന്നാണ് കേരള ഹെൽത്ത് യൂണിവേഴ്സിറ്റി അറിയിച്ചത്.

പലകുറി യൂണിവേഴ്സിറ്റിയെ സമീപിച്ചെങ്കിലും കോവിഡ് കാരണം പൂർത്തീകരിക്കാത്ത പ്രാക്ടിക്കൽ പൂർത്തീകരിക്കാനും ശേഷം പരീക്ഷ നടത്താം എന്നും ആയിരുന്നു മറുപടി. ഒടുവിൽ കോവിഡിന് ഇടയിലും വിദ്യാർത്ഥികൾ പ്രാക്ടിക്കൽ പൂർത്തീകരിക്കുകയും കോവിഡ് ഡ്യൂട്ടി, വാക്‌സിനേഷൻ ഡ്യൂട്ടി , സർവെല്ലിയൻസ് ഡ്യൂട്ടി നിർവഹിക്കുകയും ചെയ്തു. ശേഷം ഏപ്രിൽ 30 ലേക്ക് യൂണിവേഴ്സിറ്റി പരീക്ഷ നിശ്ചയിക്കുകയും ചെയ്തു. എന്നാൽ ഗവർണറുടെ ഇടപെടൽ മൂലം അത് മാറ്റിവയ്ക്കുകയും പിന്നീട് ലോക്‌ഡൌൺ പ്രഖ്യാപിക്കുകയുമായിരുന്നെന്ന് വിദ്യാർഥികൾ പറയുന്നു. കോവിഡ് മൂലമാണ് പരീക്ഷ നീണ്ടുപോകുന്നതെന്നാണ് യൂണിവേഴ്‌സിറ്റിയുടെ വാദം.

ഓഫ്‌ലൈൻ ആയി പരീക്ഷ നടത്താൻ നിലവിലെ സാഹചര്യത്തിൽ കഴിയാത്തതിനാൽ, ഓൺലൈൻ ആയി തിയറി പരീക്ഷകൾ നടത്തണമെന്നും വിദ്യാർഥികൾ ആവശ്യപ്പെടുന്നു. കേരളത്തിലെ സർവകലാശാലകൾ നിലവിൽ ഓൺലൈൻ പരീക്ഷ നടത്തുന്നുണ്ട്. പ്രാക്ടിക്കൽ പരീക്ഷകൾ OSCE(Objective Structured Clinical Examination) നടത്താവുന്നതാണ്, നിലവിൽ ഈ OSCE രീതി യൂണിവേഴ്സിറ്റി സപ്ലിമെന്‍ററി പരീക്ഷയുടെ ഭാഗമായുള്ള പ്രാക്ടിക്കൽ പരീക്ഷകൾക് വേണ്ടി അവലംബിച്ചതും ആണ്.