Black Fungus – malayalees.ch

കരിപ്പൂർ സ്വർണക്കടത്ത് കേസ്; അർജുൻ ആയങ്കിയെ കസ്റ്റഡിയിൽ വാങ്ങാൻ കസ്റ്റംസ്

Tomy Thondamkuzhy — Tue, 06 Jul 2021 04:11:02 +0000

കരിപ്പൂർ സ്വർണക്കടത്ത് കേസിലെ മുഖ്യപ്രതി അർജുൻ ആയങ്കിയുടെ കസ്റ്റഡി കാലാവധി ഇന്ന് അവസാനിക്കും. അർജുനെ ഏഴു ദിവസത്തേക്ക് കൂടി കസ്റ്റംസ് കസ്റ്റഡിയിൽ ആവശ്യപ്പെടും. അർജുനിൽ നിന്നും കൂടുതൽ വിവരങ്ങൾ ഇനിയും മനസിലാക്കാനുള്ള സാഹചര്യത്തിലാണ് കസ്റ്റഡി കാലാവധി നീട്ടാൻ കസ്റ്റംസ് തീരുമാനിച്ചത്.

അതേസമയം സ്വർണം തട്ടിയെടുക്കാൻ കൂട്ടുനിന്നെന്ന അർജുന്റെ മൊഴിയുടെ അടിസ്ഥാനത്തിൽ ടി. പി ചന്ദ്രശേഖരൻ വധക്കേസിലെ പ്രതി മുഹമ്മദ് ഷാഫിയെ നാളെയായിരിക്കും കസ്റ്റംസ് ചോദ്യം ചെയ്യുക. കൊടി സുനിയെ ജയിലിൽ ചോദ്യം ചെയ്യുന്നതിന് വേണ്ട അപേക്ഷയും കസ്റ്റംസ് ഉടൻ സമർപ്പിക്കും.

സംസ്ഥാനത്ത് ബ്ലാക്ക് ഫംഗസ് മരുന്ന് ക്ഷാമം രൂക്ഷം

Tomy Thondamkuzhy — Tue, 25 May 2021 04:59:18 +0000

സംസ്ഥാനത്ത് ബ്ലാക്ക് ഫംഗസ് രോഗികൾ നൽകുന്ന മരുന്നിന് ക്ഷാമം. മെഡിക്കൽ കോർപറേഷന്‍റെ പക്കലും മരുന്ന് സ്റ്റോക്കില്ല. മരുന്ന് ക്ഷാമം പരിഹരിക്കാൻ ഇടപെടണമെന്ന് സംസ്ഥാനം കേന്ദ്രത്തോട് ആവശ്യപ്പെട്ടു. പ്രമേഹം ഉൾപ്പെടെയുള്ള ഗുരുതര രോഗമുള്ള ബ്ലാക്ക് ഫംഗസ് ബാധിതർക്ക് നൽകുന്ന ലൈപോ സോമൽ ആംപോടെറിസിൻ ഇഞ്ചക്ഷൻ സംസ്ഥാനത്ത് സ്റ്റോക്കില്ല. തിരുവനന്തപുരം, മഞ്ചേരി, കോഴിക്കോട്, എറണാകുളം മെഡിക്കൽ കോളേജുകളിലും മരുന്നില്ല. സ്വകാര്യ ആശുപത്രികളിലും സ്റ്റോക്കില്ല. . നേരത്തെ തിരുവനന്തപുരം എസ്എടി ആശുപത്രിയിൽ നിന്നാണ് മരുന്ന് എത്തിച്ചിരുന്നത്. മെഡിക്കൽ കോർപറേഷന്‍റെ പക്കലും മരുന്ന് സ്റ്റോക്കില്ല. അതേസമയം, ആംപോടെറിസിൻ ബി ഇഞ്ചക്ഷൻ സ്റ്റോക്കുണ്ട്. ഗുരുതര രോഗികൾക്ക് ഈ മരുന്ന് നൽകുന്നത് വൃക്കയുടെ പ്രവർത്തനത്തെ ബാധിക്കും.

അതുകൊണ്ട് ഈ മരുന്ന് നൽകാനാവില്ല. സംസ്ഥാനങ്ങൾക്ക് കേന്ദ്രം നേരിട്ടാണ് മരുന്ന് വിതരണം ചെയ്യുന്നത്. 220 വയൽ മരുന്നാണ് സംസ്ഥാനം ആവശ്യപ്പെട്ടത്. രോഗികൾ കൂടിയ സാഹചര്യത്തിൽ എല്ലാ സംസ്ഥാനങ്ങളിലും ലൈപോ സോമൽ ആംപോടെറിസിൻ മരുന്ന് കടുത്ത ക്ഷാമം നേരിടുന്നു. അനുമതിയുള്ള കമ്പനികൾ ഉത്പാദനം വേഗത്തിലാക്കിയാൽ മാത്രമേ മരുന്ന് ക്ഷാമം പരിഹരിക്കാനാവൂ.

സംസ്ഥാനത്ത് ബ്ലാക്ക് ഫംഗസ് മരുന്നുകൾക്ക് ക്ഷാമം

Tomy Thondamkuzhy — Fri, 21 May 2021 12:24:44 +0000

സംസ്ഥാനത്ത് കോവിഡിനൊപ്പം വെല്ലുവിളി സൃഷ്ടിച്ച് ബ്ലാക്ക് ഫംഗസ്. ഇരുപതിലധികം പേരാണ് നിലവില്‍ സംസ്ഥാനത്ത് ചികിത്സയിലുള്ളത്. ബ്ലാക്ക് ഫംഗസിനുള്ള മരുന്ന് ക്ഷാമവും പ്രതിസന്ധിയാണ്. ബ്ലാക്ക് ഫംഗസ് എന്ന മ്യൂക്കര്‍ മൈക്കോസിസ് പുതിയ രോഗമല്ലെങ്കിലും കോവിഡ് കേസുകള്‍ കൂടിയതോടെയാണ് ആശങ്കയേറുന്നത്. കോവിഡാനന്തര അസുഖങ്ങളുടെ ഭാഗമായാണ് ബ്ലാക്ക് ഫംഗസ് കൂടുതല്‍ പേരില്‍ കണ്ടെത്തിയിരിക്കുന്നത്. തിരുവനന്തപുരം മെഡിക്കല്‍ കോളജില്‍ എട്ട് പേരാണ് ചികിത്സയിലുള്ളത്. തിരുവനന്തപുരത്ത് ചികിത്സയിലിരിക്കെ മരിച്ച പത്തനംതിട്ട സ്വദേശി അനീഷക്ക് ബ്ലാക്ക് ഫംഗസ് സ്ഥിരീകരിച്ചു. എറണാകുളത്തും പത്തനംതിട്ടയിലും ഓരോ മരണം കൂടി ബ്ലാക്ക് ഫംഗസ് മൂലമാണെന്ന് സംശയിക്കുന്നുണ്ട്.

ബ്ലാക്ക് ഫംഗസ് ചികിത്സക്കുള്ള മരുന്നിന് ക്ഷാമം നേരിടുന്നതും പ്രതിസന്ധിയുണ്ടാക്കുന്നു. കോഴിക്കോട് മെഡിക്കല്‍ കോളജില്‍ ലൈബോ സോമല്‍ ആംപോടെറിസിന്‍ ഇഞ്ചക്ഷന്‍ സ്റ്റോക്കില്ല. കേന്ദ്രം വിതരണം നടത്തിയതാണ് ക്ഷാമത്തിന് കാരണം. കോഴിക്കോട് മെഡിക്കല്‍ കോളജില്‍ സര്‍ജിക്കല്‍ ഉപകരണങ്ങള്‍ക്കും ക്ഷാമമുണ്ട്. പ്രതിരോധ ശേഷി കുറഞ്ഞവർ, അനിയന്ത്രിതമായ രീതിയില്‍ പ്രമേഹമുള്ളവര്‍‍, കാൻസര്‍ രോഗികൾ, ഐസിയുവിൽ ദീ‍ര്‍ഘനാൾ കഴിഞ്ഞവര്‍ എന്നിവരിലാണ് ബ്ലാക്ക് ഫംഗസ് ഭീഷണി കൂടുതല്‍.

കറുപ്പായോ വെളുപ്പായോ ശരീരത്തില്‍ ഒരു പാട്; ജീവനെടുക്കുന്ന ഫംഗസിന്‍റെ ഭീതിയില്‍ ഡല്‍ഹി

Tomy Thondamkuzhy — Fri, 21 May 2021 05:58:00 +0000

ബ്ലാക്ക് – വൈറ്റ് ഫംഗസുകളുടെ ഭീതിയിൽ ഡല്‍ഹി. ഇതിനകം ഇരുനൂറോളം ബ്ലാക്ക് ഫംഗസ് കേസുകളാണ് ഡൽഹിയിൽ റിപ്പോർട്ട് ചെയ്തത്. രോഗം ചികിത്സിക്കാനുള്ള മരുന്നുകളുടെ ദൗർലഭ്യവും തലസ്ഥാന നഗരിയിൽ കൂടുകയാണ്. അർബുദ, പ്രമേഹ രോഗ ബാധിതരിലാണ് ബ്ലാക്ക് ഫംഗസ് ബാധ റിപ്പോ൪ട്ട് ചെയ്യുന്നത്. രൂപപ്പെടുന്നത് ശരീരത്തിൽ ഒരു പാടായി. പക്ഷേ ക്രമേണ കോവിഡ് രോഗികളുടെ ജീവൻ തന്നെയെടുത്തേക്കാവുന്ന അപകടകാരി. വൈറ്റും ബ്ലാക്കുമായി രൂപപ്പെടുന്ന ഈ ഫംഗസിന്‍റെ ഭീതിയിലാണ് തലസ്ഥാന നഗരി. ഡൽഹി എയിംസിൽ മാത്രം ദിനേന ഇരുപതിലധികം രോഗികളിലാണ് ബ്ലാക്ക് ഫംഗസ് റിപ്പോ൪ട്ട് ചെയ്യുന്നത്. ഇതിനകം ഇരുനൂറോളം കേസുകളാണ് ഡൽഹിയിൽ റിപ്പോ൪ട്ട് ചെയ്തത്.

ശരീരത്തിലെ പഞ്ചസാരയുടെ അളവ് നിയന്ത്രിക്കാൻ കോവിഡ് രോഗികളിൽ സ്റ്റിറോയിഡ് കുത്തിവെക്കുന്നത് മൂലം ഫംഗസ് സാധ്യത വ൪ധിക്കുന്നുവെന്നാണ് പഠനങ്ങൾ ചൂണ്ടിക്കാണിക്കുന്നത്. യുക്തിരഹിതമായി സ്റ്റിറോയിഡുകൾ ഉപയോഗിക്കരുതെന്ന് കേന്ദ്ര ആരോഗ്യമന്ത്രാലയം മുന്നറിയിപ്പ് നൽകിയിട്ടുണ്ട്. ബ്ലാക് ഫംഗസ് ചികിത്സിക്കാൻ ഉപയോഗിക്കുന്ന ആംഫോടെറിസിൻ-ബി ഇൻജക്ഷന്‍റെ ലഭ്യതയും ഡൽഹിയിൽ കുറഞ്ഞിരിക്കുന്നു. ചെറിയ ആശുപത്രികളിലാണ് നേരത്തെ ദൗ൪ലഭ്യം ഉണ്ടായിരുന്നതെങ്കിൽ വലിയ ആശുപത്രികളിലും മരുന്ന് കിട്ടാനില്ലാത്ത അവസ്ഥയിലാണ് തലസ്ഥാന നഗരി. മരുന്ന് വിതരണം ക്രമീകരിക്കാനായി ഇതിനകം മൂന്നംഗ സംഘത്തെ നിയമിച്ചിരിക്കുകയാണ് ഡൽഹി സ൪ക്കാ൪.