ബാര്‍ ലൈസന്‍സ് ഫീസ് കുറയ്ക്കാന്‍ രമേശ് ചെന്നിത്തല ഉള്‍പ്പെടെയുള്ളവര്‍ക്ക് കോഴ നല്‍കിയെന്ന ബിജു രമേശിന്‍റെ വെളിപ്പെടുത്തല്‍ തള്ളി ബാറുടമകളുടെ സംഘടന രംഗത്തെത്തിയിരുന്നു. പണം പിരിക്കുകയോ ആര്‍ക്കും നല്‍കുകയോ ചെയ്തിട്ടില്ലെന്നായിരുന്നു ബാറുടമയും ഫെഡറേഷന്‍ ഓഫ് കേരള ഹോട്ടല്‍ അസോസിയേഷന്‍റെ പ്രസിഡന്‍റുമായ വി സുനില്‍ കുമാറിന്‍റെ പ്രതികരണം.

എന്നാല്‍ ബാറുടമകളുടെ ഈ വാദം പൊളിയ്ക്കുന്നതാണ് വിജിലന്‍സിന്‍റെ കണ്ടെത്തലുകള്‍. ബാര്‍ കോഴക്കേസിലെ മുന്‍ മന്ത്രി കെ ബാബുവിനെതിരായ പ്രാഥമിക അന്വേഷണത്തില്‍ 2011 മുതല്‍ 2014 വരെയുള്ള കാലയളവില്‍ പണം പിരിച്ചെന്നാണ് വിജിലന്‍സ് റിപ്പോര്‍ട്ടിലുള്ളത്. 27,79,89,098 രൂപയാണ് ബാറുടമകള്‍ പിരിച്ചത്. ഈ തുക എന്തിന് ഉപയോഗിച്ചെന്ന് കണ്ടെത്താതെയാണ് വിജിലന്‍സ് അന്വേഷണ റിപ്പോര്‍ട്ട് സമര്‍പ്പിച്ചതെന്നും വ്യക്തമായി. നിയമ നടപടികള്‍ക്കായി പണം പിരിച്ചിരുന്നുവെന്ന് നേരത്തെ ബാറുടമകള്‍ അവകാശപ്പെട്ടിരുന്നെങ്കിലും ഇതിന് തെളിവ് പുറത്ത് വിടാന്‍ ഉടമകള്‍ക്ക് കഴിഞ്ഞിരുന്നില്ല.

ബാര്‍ ലൈസന്‍സ് ഫീസ് കുറയ്ക്കാന്‍ രമേശ് ചെന്നിത്തല ഉള്‍പ്പെടെയുള്ളവര്‍ക്ക് കോഴ നല്‍കിയെന്നായിരുന്നു ബിജു രമേശിന്‍റെ വെളിപ്പെടുത്തല്‍. ബാറുടമകളുടെ സംഘടനയുടെ നേതൃത്വത്തില്‍ ഉടമകളില്‍ നിന്ന് പണം പിരിച്ച് നല്‍കിയെന്നാണ് ബിജു രമേശ് പറ‌ഞ്ഞിരുന്നത്. ഈ വാദം പൂര്‍ണ്ണമായും തള്ളുകയാണ് ബാറുടമകളുടെ സംഘടന. പണം പിരിക്കുകയോ, ആര്‍ക്കും നല്‍കുകയോ ചെയ്തിട്ടില്ലെന്നാണ് സംഘടനയുടെ നിലപാട്. സ്ഥിരതയില്ലാത്ത നിലപാടാണ് ബിജു രമേശ് സ്വീകരിക്കുന്നതെന്നും ബാറുടമകളുടെ സംഘടനയായ ഫെഡറേഷന്‍ ഓഫ് കേരള ഹോട്ടല്‍ അസോസിയേഷന്‍റെ പ്രസിഡന്‍റ് വി.സുനില്‍ കുമാര്‍ വിമര്‍ശിച്ചു.

ബിജു രമേശിന് പിന്നില്‍ രാഷ്ട്രീയ സ്വാധീനമുണ്ടെന്ന സംശയവും ഒരു വിഭാഗം ബാറുടമകള്‍ ഉന്നയിക്കുന്നുണ്ട്. കെ.എം മാണിക്കെതിരായി അന്വേഷണം നടക്കുന്ന വേളയിലും ബാറുടമകള്‍ക്കിടയില്‍ സമാനമായി ഭിന്നതകള്‍ ഉണ്ടായിരുന്നു. എന്നാല്‍ ആരോപണത്തില്‍ ഉറച്ച് നില്‍ക്കുന്നുവെന്നും ബാറുടമകള്‍ തുറന്ന് പറയാത്തത് സമ്മര്‍ദ്ദം കാരണമാണെന്നുമാണ് ബിജു രമേശിന്‍റെ നിലപാട്.