കേരളത്തിൽ നിന്ന് ബഹ്റൈനിൽ തിരിച്ചെത്താൻ എയർ ടിക്കറ്റിന് അരലക്ഷത്തിലേറെ രൂപ മുടക്കേണ്ടി വരുന്ന അവസ്ഥയാണ് പ്രവാസികളെ വിഷമസന്ധിയിലാക്കുന്നത്. വിഷയത്തിൽ കേന്ദ്ര കേരള സർക്കാരുകൾ ഇടപെടണമെന്നാണ് പ്രവാസികളുടെ ആവശ്യം.

എയർ ബബിൾ കരാർ നടപ്പിലാകുന്നതോടെ യാത്രാ പ്രശ്നങ്ങൾക്ക് പരിഹാരമാകുമെന്ന് സമാശ്വാസമായിരുന്നു വിസ കാലാവധി തീരുമെന്നും ജോലി നഷ്ടപ്പെടുമെന്നുമുള്ള ആശങ്കകളോടെ കേരളത്തിൽ തങ്ങേണ്ടി വന്ന പ്രവാസികൾക്ക്. എന്നൽ കരാർ നടപ്പിലായിട്ടും എയർ ടിക്കറ്റ് കിട്ടാൻ വൻ തുക മുടക്കേണ്ട അവസ്ഥയാണുള്ളത്.

വിമാനയാത്രാ നിരക്ക് വിഷയത്തിൽ ഇടപെട്ട് നിരക്ക് കുറക്കാൻ കേന്ദ്ര സംസ്ഥാന സർക്കാരുകൾ സത്വര നടപടികൾ സ്വീകരിക്കണമെന്നാണ് പ്രവാസികളുടെ ആവശ്യം. ബഹ്‌റൈന്‍ പ്രവാസി മലയാളികളുടെ യാത്രാദുരിതത്തിന് പരിഹാരം കാണാൻ നടപടികള്‍ സ്വീകരിക്കണമെന്ന് അഭ്യര്‍ത്ഥിച്ച് കുഞ്ഞാലിക്കുട്ടി എം.പി പ്രധാനമന്ത്രി നരേന്ദ്ര മോദിക്കും കേന്ദ്ര വ്യോമയാന മന്ത്രി ഹര്‍ദീപ് സിങ് പൂരിക്കും കത്തയച്ചിരുന്നു.

ഈ ആവശ്യമുന്നയിച്ച് വിവിധ പ്രവാസി സംഘടനകളും അധിക്യതർക്ക് നിവേദനം നൽകി. വിഷയത്തിൽ കേന്ദ്ര കേരളസർക്കാരുകളുടെ ഇടപെടൽ ഉണ്ടാകുമെന്ന പ്രതീക്ഷയിലാണ് ബഹ്റൈൻ പ്രവാസികൾ.

കോവിഡ് കാലത്ത് ബഹ്റൈനിലേക്കൊന്ന് തിരിച്ചെത്താൻ പ്രവാസികൾ എയർ ടിക്കറ്റിന് മുടക്കേണ്ട തുക കേട്ടാൽ ആരുമൊന്ന് ഞെട്ടും. നാല്പതിനായിരം മുതൽ അൻപത്തി അയ്യായിരം രൂപ വരെയാണ് നിരക്ക്. കോവിഡ് കാലം പ്രവാസികൾക്ക് സമ്മാനിച്ച കടുത്ത യാത്രാദുരിതങ്ങൾക്ക് വിമാനക്കമ്പനികൾ വൻ ചാർജ് ഈടാക്കുന്നത്.

ചാർട്ടേർഡ് ഫ്ലൈറ്റിലും വന്ദേഭാരത് മിഷൻ വിമാനങ്ങളിലും സീറ്റ് ഒപ്പിച്ചെടുക്കാനുള്ള പെടാപ്പാടായിരുന്നു ആദ്യം. എയർ ഇന്ത്യയുടെയും ഗൾഫ് എയറിൻ്റെയും കൂടുതൽ വിമാനങ്ങൾക്ക് വേണ്ടി വന്നത് നീണ്ട കാത്തിരിപ്പ്. ഒടുവിൽ എല്ലാം ശരിയാക്കാൻ എയർ ബബിൾ കരാർ വരുന്നു എന്ന പ്രതീക്ഷയായി. ഒടുവിൽ കരാർ നടപ്പിലായപ്പോൾ അടിമുടി ദുരൂഹതയുമായി ഓൺലൈനിലോ ഓഫ് ലൈനിലോ ടിക്കറ്റ് കിട്ടാനില്ലാത്ത അവസ്ഥയും കാണേണ്ടി വന്നു.

ഒടുവിൽ ടിക്കറ്റ് ക്ഷാമം ഒന്ന് തീർന്നപ്പോഴാകട്ടെ അത് കിട്ടാൻ വൻ തുക മുടക്കേണ്ട ദുരവസ്ഥയും. വിമാനയാത്രാ നിരക്ക്. വിഷയത്തിൽ ഇടപെട്ട് നിരക്ക് കുറക്കാൻ കേന്ദ്ര സംസ്ഥാന സർക്കാരുകൾ സത്വര നടപടികൾ സ്വീകരിക്കണമെന്നാണ് പ്രവാസികളുടെ ആവശ്യം.