അക്ഷയ് കുമാർ തന്നെയാണ് വിഡിയോ ട്വിറ്ററിൽ പങ്കുവെച്ചത്. ‘നിങ്ങളോടൊപ്പമുള്ള ഈ നൃത്തം ഞാൻ എന്നേക്കും ഓർക്കും മോഹൻലാൽ സാർ. തികച്ചും അവിസ്മരണീയമായ നിമിഷം’, അക്ഷയ് കുമാർ കുറിച്ചു. പിന്നാലെ നിരവധി പേര്‍ കമന്‍റുകളുമായി രംഗത്തെത്തി. കൂടാതെ കല്യാണത്തിന് നിരവധി സിനിമാതാരങ്ങളാണ് എത്തിയിരിക്കുന്നത്.

ജയ്പൂരിലെ രാംബാഗ് കൊട്ടാരത്തിൽ വച്ചാണ് വിവാഹ ചടങ്ങ് നടന്നത്. ആമിർ ഖാൻ, കരൺ ജോഹർ എന്നിവരുൾപ്പെടെ നിരവധി താരങ്ങൾക്കൊപ്പം പൃഥ്വിരാജ് സുകുമാരനും ചടങ്ങിൽ പങ്കെടുക്കുകയും അക്ഷയ് കുമാറിനൊപ്പം പഞ്ചാബി ചുവടുകൾ വയ്ക്കുകയും ചെയ്‌തു.

അതേസമയം നീണ്ട 28 വർഷങ്ങൾക്ക് ശേഷവും ആടുതോമയെ വീണ്ടും ഇരു കൈകളും നീട്ടി സ്വീകരിച്ച പ്രേക്ഷകർക്ക് നന്ദിയറിയിച്ച് നടൻ മോഹൻലാൽ രംഗത്തെത്തി. നിങ്ങൾ നൽകുന്ന അതിശക്തമായ പ്രതികരണത്തിനും സ്നേഹത്തിനും വാക്കുകൾക്കതീതമായ നന്ദി അറിയിക്കുന്നെന്നും അദ്ദേഹം തന്റെ ഫേസ്ബുക്കിൽ കുറിച്ചു.

‘നീണ്ട 28 വർഷങ്ങൾക്ക് ശേഷവും ആടു തോമയ്ക്ക് നിങ്ങൾ നൽകുന്ന അതിശക്തമായ പ്രതികരണത്തിനും സ്നേഹത്തിനും വാക്കുകൾക്കതീതമായ നന്ദി അറിയിക്കുന്നു. സ്ഫടികം 4കെ അറ്റ്മോസിനും പിന്നിൽ പ്രവർത്തിച്ച ഭദ്രൻ സാറിനും ടീമിനും വലിയ നന്ദിയും സ്നേഹവും’, മോഹൻലാൽ ഫേസ്ബുക്കിൽ കുറിച്ചു.