ഡൽഹി- ഹരിയാന അതിർത്തികളിൽ പോലീസും കർഷകരും തമ്മിൽ പലഘട്ടങ്ങളിലും ഏറ്റുമുട്ടി. ഇത് കേന്ദ്ര സർക്കാരിന് നാണക്കേട് ഉണ്ടാക്കിയതോടെയാണ് സമവായ നീക്കങ്ങൾ തുടങ്ങിയത്. ഡിസംബർ മൂന്നിന് ചർച്ച നടത്താമെന്നും സമരക്കാർ പിന്മാറണമെന്നും കേന്ദ്ര കൃഷിമന്ത്രി ആവശ്യപ്പെട്ടു. എന്നാൽ സമരത്തിൽ നിന്ന് പിന്മാറില്ലെന്ന നിലപാടിലാണ് കർഷകർ.

ഒരു വിഭാഗം കർഷകർ ഡൽഹി ബുറാഡിയിലെ മൈതാനത്തിലേക്ക് സമരവുമായി മാറി. എന്നാൽ സിങ്കു അതിർത്തിയിൽ തമ്പടിച്ച കർഷകർ അവിടെ തുടരുമെന്ന് അറിയിച്ചു. ജന്തർ മന്ദറിൽ സമരം ചെയ്യാൻ അനുവദിച്ചില്ലെങ്കിൽ പാനിപത്ത് ഡൽഹി ദേശീയ പാത ഉപരോധിക്കുന്നത് തുടരാനാണ് കർഷകരുടെ നീക്കം.

ഡൽഹിയിൽ എത്തുന്ന കർഷകർക്ക് എല്ലാവിധ സഹായങ്ങളും നൽകുമെന്ന് സംസ്ഥാന സർക്കാർ വ്യക്തമാക്കി. കുടിവെള്ളം, ശുചിമുറികൾ എന്നിവക്ക് സൗകര്യം ഉണ്ടാക്കും. മുഖ്യമന്ത്രി അരവിന്ദ് കെജ്രിവാൾ നേരിട്ട് വിഷയം പരിശോധിക്കുമെന്നും സർക്കാർ വ്യക്തമാക്കി. വരും ദിവസങ്ങളിലും സമരം കൂടുതൽ ശക്തമാക്കാനാണ് സാധ്യത.

ഏത് വിഷയവും ചര്‍ച്ചചെയ്ത് അഭിപ്രായ വ്യത്യാസങ്ങള്‍ പരിഹരിക്കാനാകും. ചര്‍ച്ചയില്‍ പോസിറ്റീവ് ആയ ഫലം ഉണ്ടാകുമെന്ന് ഉറപ്പുണ്ടെന്നും മന്ത്രി തോമര്‍ പറഞ്ഞു. പുതിയ കാര്‍ഷിക നയം ഈ കാലത്തിന്റെ ആവശ്യമാണ്. വരും കാലങ്ങളില്‍ ഇത് വിപ്ലവകരമായ മാറ്റങ്ങളാണ് ഉണ്ടാക്കുക. ഡിസംബര്‍ മൂന്നിന് കേന്ദ്രസര്‍ക്കാര്‍ ചര്‍ച്ചയ്ക്ക് തയ്യാറാണെന്നും കേന്ദ്രമന്ത്രി തോമര്‍ പറഞ്ഞു. കര്‍ഷകരുടെ ഡല്‍ഹി ചലോ മാര്‍ച്ചിനെ ഡല്‍ഹി അതിര്‍ത്തിയില്‍ പൊലീസ് തടഞ്ഞു.