സെപ്റ്റംബര്‍ 14 മുതല്‍ ഒക്ടോബര്‍ 1 വരെ ചേരാനിരുന്ന വര്‍ഷകാലസമ്മേളനത്തില്‍ 43 ബില്ലുകളാണ് പാര്‍ലമെന്‍റിന്‍റെ പരിഗണനക്ക് വിടാന്‍ സര്‍ക്കാര്‍ തീരുമാനിച്ചത്. കാര്‍ഷിക മേഖലയെ സംബന്ധിക്കുന്ന മൂന്ന് ബില്ലുകള്‍ അടക്കം പ്രധാനപ്പെട്ട ബില്ലുകള്‍ എല്ലാം പാസാക്കിയെടുക്കാന്‍‍ കേന്ദ്ര സര്‍ക്കാരിനായി. പ്രതിപക്ഷം എതിര്‍പ്പുന്നയിച്ച ബില്ലുകളില്‍ ഒന്ന് പോലും സ്റ്റാന്‍ഡിങ്ങ് കമ്മിറ്റിക്കോ സെലക്ട് കമ്മിറ്റിക്കോ വിടാന്‍ സര്‍ക്കാര്‍ തയ്യാറായില്ലെന്ന് പ്രതിപക്ഷം ആരോപിച്ചു.

ഇന്ത്യാ- ചൈന സംഘര്‍ഷം, സാമ്പത്തിക പ്രതിസന്ധി, തൊഴിലില്ലായ്മ, കോവിഡ് പ്രതിരോധത്തിലെ പാളിച്ച എന്നിങ്ങനെ സര്‍ക്കാരിനെതിരെയുള്ള വിഷയങ്ങള്‍ മുഴുവന്‍ സമ്മേളന കാലയളവില്‍ വഴി തിരിച്ച് വിടാന്‍ സര്‍ക്കാരിന് കഴിഞ്ഞു.

എന്നാല്‍ രാജ്യസഭയിലെ കാര്‍ഷിക ബില്‍ വോട്ടെടുപ്പിനിടെയുണ്ടായ പ്രതിഷേധവും പ്രതിപക്ഷ എംപിമ്മാരെ പുറത്താക്കിയതും രാഷ്ട്രീയമായി ഉയര്‍ത്താന്‍ അവര്‍ക്ക് കഴിഞ്ഞു. സമ്മേളനം അവസാനിച്ചാലും കര്‍ഷക വിഷയം രാജ്യത്ത് സജീവ ചര്‍ച്ചയാകും.

സംസ്ഥാനങ്ങളുടെ അധികാരത്തിന്‍മേലുള്ള കടന്ന് കയറ്റമാണ് കാര്‍ഷിക ബില്ലെന്ന് നേരത്തെ മന്ത്രിസഭ യോഗം വിലയിരുത്തിയിരുന്നു. ഭരണഘടനയുടെ കൺകറന്റ് ലിസ്റ്റിലുളള വിഷയമായ കൃഷിയില്‍ നിയമനിര്‍മ്മാണം നടത്തുമ്പോള്‍ സംസ്ഥാനങ്ങളുമായി ആലോചിക്കാത്തത് ഗുരുതരമായ ഭരണഘടനാ പ്രശ്നമാണെന്നാണ് സര്ക്കാരിന് ലഭിച്ച നിയമോപദേശം.

നേരത്തെ കേന്ദ്രം കൊണ്ടുവന്ന അഗ്രികൾച്ചറൽ പ്രൊഡ്യൂസ് മാർക്കറ്റിങ് കമ്മിറ്റി ആക്ട് കേരളവും ബിഹാറും അടക്കം എട്ട് സംസ്ഥാനങ്ങൾ ഇനിയും അംഗീകരിച്ചിട്ടില്ല. ഈ സാഹചര്യത്തിൽ ഇപ്പോൾ രാജ്യസഭ പാസാക്കിയ ബില്ലുകളെയും നിയമപരമായി ചോദ്യം ചെയ്യാനാകും എന്ന നിയമോപദേശവും അനുകൂലമായിട്ടാണ് സര്‍ക്കാര്‍ കാണുന്നത്.