അർജുൻ തെണ്ടുൽക്കറിൻ്റെ ആദ്യ ഐപിഎൽ വിക്കറ്റ് നേട്ടം ആഘോഷിച്ച് മുംബൈ ഇന്ത്യൻസ്. മത്സരത്തിനു ശേഷം അർജുൻ്റെ ഈ നേട്ടം കേക്ക് മുറിച്ചാണ് ടീം അംഗങ്ങൾ ആഘോഷിച്ചത്. സൺറൈസേഴ്സ് ഹൈദരാബാദിനെതിരെ ഇന്നലെ നടന്ന മത്സരത്തിലാണ് അർജുൻ തൻ്റെ ആദ്യ വിക്കറ്റ് നേടിയത്. സൺറൈസേഴ്സിൻ്റെ അവസാന വിക്കറ്റായ ഭുവനേശ്വർ കുമാറിനെ രോഹിത് ശർമയുടെ കൈകളിലെത്തിച്ചാണ് താരത്തിൻ്റെ കന്നി വിക്കറ്റ് നേട്ടം.
മത്സരത്തിൽ 2.5 ഓവർ പന്തെറിഞ്ഞ അർജുൻ 18 റൺസ് വഴങ്ങിയാണ് ഒരു വിക്കറ്റ് വീഴ്ത്തിയത്. പവർ പ്ലേയിൽ രണ്ട് ഓവർ എറിഞ്ഞ താരം പിന്നീട് അവസാന ഓവറിലാണ് രണ്ടാം സ്പെല്ലിനായി എത്തിയത്. 20 റൺസ് ആണ് ഓവറിൽ പ്രതിരോധിക്കേണ്ടിയിരുന്നത്. ഓവറിൽ വെറും നാല് റൺസ് മാത്രമേ അർജുൻ വിട്ടുനൽകിയുള്ളൂ.
