മോഹന്‍ലാല്‍- പൃഥ്വിരാജ് കൂട്ടുകെട്ടിലൊരുങ്ങിയ ലൂസിഫറിന്റെ പ്രദര്‍ശനം തുടങ്ങി. കേരളത്തിലെ 400 കേന്ദ്രങ്ങളിലാണ് ചിത്രത്തിന്റെ റിലീസ്. പൃഥ്വിരാജിന്റെ ആദ്യ സംവിധാന സംരംഭമാണ് ചിത്രം. രാവിലെ തുടങ്ങിയ ഷോ കാണാന്‍ എറണാകുളം കവിതാ തിയറ്ററില്‍ പൃഥ്വിരാജ്, മോഹന്‍ലാല്‍ തുടങ്ങി ചിത്രത്തിലെ താരങ്ങളും അണിയറ പ്രവര്‍ത്തകരുമെത്തി.
കേരളത്തിനകത്തും പുറത്തുമായി 3079 തിയറ്ററുകളില്‍ ചിത്രമെത്തുന്നത്. മോഹന്‍ലാലിനെ നായകനാക്കി പൃഥ്വിരാജൊരുക്കുന്ന ചിത്രം, പൃഥ്വിരാജിന്റെ ആദ്യ സംവിധാന സംരഭം തുടങ്ങി നിരവധി പ്രത്യേകതകളുമായാണ് ലൂസിഫറിന്റെ വരവ്.
ഒരു പൊളിറ്റിക്കല്‍ ത്രില്ലറാണ് ചിത്രം. സ്റ്റീഫന്‍ നെടുംമ്പള്ളി എന്ന കഥാപാത്രമായാണ് മോഹന്‍ലാല്‍ എത്തുന്നത്. ബോളിവുഡ് താരം വിവേക് ഒബ്റോയ്, മ‍ഞ്ജു വാര്യര്‍, ടോവിനോ തോമസ്, ഇന്ദ്രജിത്ത്, സാനിയ, സായ്കുമാര്‍, തുടങ്ങി വന്‍ താരനിര തന്നെയുണ്ട് ചിത്രത്തില്‍. പൃഥ്വിരാജ് ഒരു സ്പെഷ്യല്‍ അപ്പിയറന്‍സില്‍ എത്തുമെന്നതും ചിത്രത്തിന്റെ പ്രത്യേകതയാണ്.
മുരളി ഗോപിയാണ് തിരക്കഥയൊരുക്കിയിരിക്കുന്നത്. 40 കോടി മുതല്‍മുടക്കില്‍ ചിത്രം നിര്‍മിച്ചിരിക്കുന്നത് ആന്റണി പെരുമ്പാവൂരാണ്. കേരളത്തില്‍ മാത്രമായി 400 കേന്ദ്രങ്ങളിലാണ് റിലീസ്. നേരത്തെ പുറത്തിറങ്ങിയ ട്രെയിലര്‍ സോഷ്യല്‍ മീഡിയയില്‍ ഹിറ്റായിരുന്നു. ചിത്രവും സൂപ്പര്‍ഹിറ്റാകുമെന്ന പ്രതീക്ഷയിലാണ് അണിയറ പ്രവര്‍ത്തകര്‍.
